Pasahero ta warda pa check in na Flamingo Airport – potrèt: Belkis Osepa
KRALENDIJK – E nombramentu di un Konseho di Komisario di tres persona (RvC) di Bonaire International Airport (BIA) parse no por faya. Tòg Representante di reino Gilbert Isabella mester aprobá e tres kandidatonan ainda.
Gezaghebber Edison Reina ta papia di un ‘dreamteam’. Èks trahadó di KLM Jan Willem Storm, èks CEO di John F. Kennedy Airport Alain Maca – ku alabes ta èks komisario di e konseho ku a baha luna pasá – i èks promé minister di Antia Hulandes Etienne Ys ta bai forma e konseho.
Bonerianu
Niun di e tres komisarionan nobo no ta bonerianu ni no ta biba riba e isla. Segun gobièrnu bonerianu e kandidatonan ta masha kapabel riba tereno di aviashon i finansa i nan tin hopi eksperiensha. Miembro di konseho insular Benito Dirksz (MBL) ta puntra pakiko no tin niun bonerianu den e RvC di BIA. “Kada be nos ta deklará ku mester duna e yu di tera oportunidat. Ma tòg nos no ta hasié. Tin bonerianu kapabel ku ke kontribuí na nan isla. Mi ta lamentá ku e konseho no ta bonerianu ni pa un porshento, kòrda shen porshento.”
Benito Dirksz
Solisitashon habrí
Dirksz ta proponé pa den futuro kuminsá un prosedura di solisitashon habrí ora mester nombra konseho, direktiva i funshon públiko serka kompania di gobièrnu. “Asina nos ta evitá di akusá otro di wega polítiko ora di nombramentu. Aktualmente un hende ku no kai na agrado di e koalishon na mando, nunka no por bira komisario.” Diputado Edsel Winklaar ta haña su proposishon ‘un bon idea’.
Ounke no a risibí Isabella su aprobashon ainda e komisarionan nobo a tuma informashon kaba di e plannan pa desaroyá Flamingo Airport i nan a sera konosí ku gobièrnu bonerianu, akshonista di BIA.
Rèspèt
Den un reunion di konseho insular djabièrnè pasá e miembro di konseho Marugia Janga (PDB) a indiká ku e situashon ta ekstremamente bruá. El a pone énfasisi riba bon gobernashon. “Mi no ta di akuerdo ku e prosedura. Pakiko mester tende e konseho ainda i Isabella aprobá e nombramentunan? Mi ta haña ku ta falta di rèspèt pa e konseho i e Representante di reino.” Diputado Edsel Winklaar ta para e krítika i a indiká ku e komisarionan nobo mes a paga pa bishitá Boneiru pa deliberashon.
Investigashon
Gobièrnu a kalkulá 43.500 dòler pa RvC pa e aña aki. Diessinku mil ta pa gastu di biahe i estadia i 28.500 komo pago. Ademas bestuurscollege a tuma paso pa laga SEO Investigashon Ekonómiko hasi un investigashon di asuntunan na BIA. Aktualmente ta trahando riba e preguntanan di e investigashon i e Terms of Reference (ToR), Winklaar ta bisa.
Espesialmente mester investigá e relashon entre e akshonista i e RvC anterior i e motibunan pakiko nan a baha. Problemanan ta e nombramentunan den direktiva i e falta di finansa. BIA mester tuma medida pa mas entrada. Ainda e akshonista no a trata e sugerensha pa oumento di e impuesto di aeropuerto.
Aktualmente BIA ta buska invershonista ku ke paga mas o ménos 25 mion euro pa konstrukshon di un terminal nobo. E terminal ta parti di un masterplan ku ta kore te 2023. Boneiru tin e intenshon di konsentrá riba merkado brasileño. Un koneksho aéreo direkto ku Manaus mester duna ekonomia un empuhe.
Outor Belkis Osepa