Foto: Ariën Rasmijn
ORANJESTAD — Awo cu un trahado di Examenbureau ta wordo sospecha pa Ministerio Publico riba fraude cu examen di lenguahe den proceso di naturaliscacion, Reino ta tumando extra precaucion na Aruba cu e test, segun minister di Enseñanza Michelle Hooyboer-Winklaar.
Landsrecherche sinembargo ya caba a duna informacion na gabinete di gobernador cu na final ta esun encarga cu naturalisacion y otorgamento di paspoort. Gabinete na su beurt a informa gobierno di Reino na Hulanda.
Ariën Rasmijn den combersacion cu minister Hooyboer-Winklaar
E mandatario ta indica cu su ministerio mes a bati alarma na autoridadnan ora cu a nota cu un trahador lo tabata yudando aplicantenan pa nacionalidad Hulandes cu respuestanan di antemano riba e test di lenguahe. “Landsrecherche a drenta y a haci nan investigacion”, segun e minister, cu no por indica ainda con grandi e fraude tabata y si acaso tabatin mas caminda na unda e empleado aki – primo di ambos minister di Asuntonan Social Paul Croes y lider di MEP Evelyn Wever-Croes – lo por a comete actonan indebido.
Representante di Reino
“Nos a haya un confirmacion di e Staatssecretaris di Husticia di Hulanda. gradeciendo nos pa e cooperacion, cu e hecho cu nos a señala y cu tur cos a cana na manera cu tabatin mester. Nan ta bisa nos cu nan lo pone extra sistemanan di monitorea pa asina percura cu esaki no pasa mas”, segun minister Hooyboer-Winklaar. “Entre otro, manera cu un toets ta wordo haci, nan lo por manda un hende pa ta presente durante e toets. Nan tambe lo por pidi pa haci un otro toets si nan ta sospecha algo. Esaki ta cosnan cu nan lo por tin totalmente derecho pa haci.” Mientras tanto ta keda wak con por sigui protehe e sistema di aplica pa un paspoort Hulandes contra personanan cu segun minister Hooyboer-Winklaar kier ‘bypass’ e sistema. Segun e mandatario ya e posibilidad ta vigor caba cu Reino por manda un representande den forma di un trahador di gabinete di gobernador pa controla riba test di lenguahe.
Fiscal tin cu dicidi ainda
Mientras tanto e trahador di examenbureau en cuestion ta keda bou sospecho, asina vocero di Ministerio Publico Ann Angela ta confirma. E no ta deteni na momentonan aki. “E investigation ta cla y a wordo entrega na Ministerio Publico pa evaluacion. Fiscal tine riba su lessenaar y dentro di un tempo rasonabel e lo bay dicidi si ta persiguie of no y na ki manera, sea via Hues of den un TOM-zaak”
Autor: Ariën Rasmijn