Edificio di Departamento di Enseñanza. Foto: Ariën Rasmijn
ORANJESTAD — Den e caso di malversacion di placa di financiamento di estudio tin dos detencion mas cu a cay. Ta trata di aki dos ambtenaar femenino na Departamento di Enseñanza cu inicialnan Y.R. y G.Q.
“Dos persona a wordo deteni siman pasa. Diabierna nan a wordo treci dilanti Hues Comisario. Nan ta wordo sospecha di a pidi financiamento y deposita esakinan na nan nomber tambe”, asina vocero di Ministerio Publico Ann Angela ta confirma. E sospecho ta cu ambos ta envolvi den e malversacion di casi un miyon florin pa cual dos otro trahado cu inicial V.Q. y L.T., casa cu G. ya caba ta cera pendiente investigacion. Diabierna awo Hues Comisario lo bay wak Q. y R. un biaha mas pa determina si nan mester keda den detencion pa un periodo mas largo.
Mientras tanto, minister di Enseñanza Michelle Hooyboer-Winklaar ta declara cu su ministerio no ta envolvi den investigacion contra e cuater trahadornan di gobierno. Su ministerio a duna tur cooperacion y aceso na informacion caba na e autoridadnan concerni.
Un miyon
Na cuminsamento di augustus a sali na cla cu dos empleado di Departamento di Enseñanza a wordo deteni riba sospecho cu nan lo a horta un suma di entre 750.000 y 800.000 florin for di fondo di prestamo estudiantil. Suma aki lo a wordo saca poco poco desde 2005.
Autor Ariën Rasmijn