E nabegantenan di Ukraina i nan kompañadó ta yega korte – potrèt: The Daily Herald / Althea Merkman
ORANJESTAD – Dos nabegante di Ukraina ku na mart a keda pegá na Statia despues di un pleitu ku e kapitan di nan barku, di tur manera por keda riba e isla te dia 7 di oktober. Riba e dia ei Korte den Promé Instansha lo husga e petishon di asilo polítiko di Taras Vakarchuk i Vladimir Makarenko.
Segun e abogado di e dos hòmbernan ukraino, Cindy Marica, su klientenan ta refugiado berdadero ku tin mester di protekshon di Hulanda.
Peliger
Sekretario di estado Fred Teeven na promé instansha a rechasá e petishon di asilo. E tabata haña – i te ainda ta haña – ku e hòmbernan por bai nan pais bèk sin peliger. E ukrainonan ta pensa diferente: nan ta papia solamente ruso i den un área ku kompatriota ku ta papia ukraino so nan lo kore peliger òf haña nan aneksá pa separatista ruso.
Interes finansiero
Djamars e opheshon ku Marica a entregá pa su klientenan kontra e desishon negativo di Teeven tabata den korte di Statia. Segun Marica, Teeven solamente tin un interes finansiero den e deportashon pasobra akohida di e dos buskadónan di asilo ta kosta estado mas o ménos 1500 dòler pa luna.
Laissez-passer
E abogado di estado ayera a bisa ku emigrashon ta trahando pa haña un asina yamá laissez-passer, un dokumentu pa laga e hòmbernan biaha bai nan pais bèk. Marica no ta di akuerdo. “Nan ta kore riesgo ku ukraino rabiá ta mata nan pasobra nan ta papia ruso.”
Vakarchuk i Makarenko a keda pegá na Statia despues ku e kapitan di nan barku a bai for di e isla i keda ku nan pasaporte.
Outor: Hilbert Haar