For di hóben hopi yu di Kòrsou ta soña ku un karera den beisbòl na Merka – potrèt: Elisa Koek
WILLEMSTAD – “Semper bo tabata esun di mihó’, pero na Merka bo ta kuminsá te abou atrobe”, Avi Becher, Operations Coördinator serka Detroit Tigers ta konta. E tin mas ku dies aña ta traha den mundu di beisbòl i el a mira hopi talento kibra.
E problema di mas grandi segun Becher ta ku hopi hungadó strañero, kurasoleño tambe, ta kere ku nan ta kla ora nan bai Merka. Pero ta nèt kontrali. “Ta ora nan yega aki numa e trabou duru ta kuminsá.”
Becher a lanta na Kòrsou i semper tabata un gran fanátiko di beisbòl. Ora el a realisá ku su talento no ta riba vèlt el a bai studia Sport Management. Na 2002 el a sera konosí ku Hensley Meulens i despues di esaki Becher su propio’ karera den deporte’ a kuminsá. “M’a yuda Meulens ku un evento karitativo i semper nos a keda bon amigu. Meulens a logra na Merka pasobra e tabata tuma desishonnan bon pensá i espesialmente pasobra e tabata traha duru.”
Realidat duru
Becher ta mira hopi talento hóben ku ta soña di un karera den Major League. E soño aki no ta straño, pasobra e salario mínimo pa un hungadó ta 500 mil dòler. “Ta shete porshento so ta logra den Major League ke men e hungadó mester ta masha bon mes. Ademas e mundu di beisbòl na Merka ta duru. Na Kòrsou tin amistat entre e hungadónan, pero na Merka ta tempu di wega ta konta. E miembronan di bo tim ta hasi tur loke nan por pa haña mas tempu di wega, tur hende ta bo konkurente. Komo yu di Kòrsou semper bo mester hunga mas haltu ku bo nivel, si bo laga slèk b’a kue awa. Pone soledat i falta di kas aseka i bo ta realisá ku e soño pa bira profeshonal ta duru i difísil.”
Sobresalí
Segun profeshonal Johnny Gregorius e soño di tur pelotero na Kòrsou ta pa bai Merka. Gregorius añanan largu a hunga komo profeshonal, pero e mester a laga e soño merikano bai. “Na Hulanda no tin hopi mucha hòmber ku e mésun eksperiensha i kurpa ku e yunan di Kòrsou, na Merka si. Bo por ta esun di mas mihó pero einan tin miles. Bo mester nèt haña e chèns di prueba bo mes i sobresalí.” Gregorius su ruman hòmber chikí Mariekson sí a haña e oportunidat ei i e ta sali pa Arizona Diamondbacks den Major League. “Mi ruman hòmber chikí ta biba nos soño i ami ta fókùs riba soño nobo.”
Invertí den beisbòl
Thakaidzwa Doran, èks presidente di Bònt di Beisbòl Kurasoleño ta pensa ku bon maneho por hiba e yunan di Kòrsou bai tòp. Segun e no ta eksistí maneho profeshonal di deporte na Kòrsou. Coaching, bon alimento, disiplina i struktura por kontribuí na desaroyo di talento. Ademas nos no tin e materialnan adekuá i tin un skarsedat grandi di fasilidat di deporte riba e isla.” Doran na 2012 mes a kuminsá akademia di beisbòl na Band’Abou, bou di maneho di èks profeshonal. Aki talentonan hóben ta siña struktura i disiplina pasobra tin kontakto entre skol, deporte i bario. “Mi ta spera di por lanta e akademia riba henter e isla, pero mi mester di ayudo. Ta bira tempu pa invertí den nos talentonan.”
Becher tambe ta konsehá pa invertí den un akademia lokal. Gobièrnu mester hunga un papel den esaki. “Mester invertí hopi den deporte na Kòrsou: ku plaka i ku esfuerso. Gobièrnu mester bira mas aktivo i usa nan kontaktonan den strañero, pasobra nan tin e kontaktonan aki. Manda buska profeshonal i coach for di Merka pa nan por guia talento i prepará pa beisbòl merikano organisá.
Outor: Elisa Koek