Fundashon Kuido di Ambulans a haña 4 ambulans nobo – pòtrèt José Manuel Dias
WILLEMSTAD – No a kumpra e kuater ambulansnan nobo di Fundashon Kuido di Ambulans di e díler lokal ku ta Prestige Ford, sino direktamente serka e fabrikante. E díler lokal tabata enkargá solamente ku e parti di mantenshon di e ambulansnan. Esaki Darren Hollander di Prestige Ford a konfirmá. El a preferá di no duna komentario.
Kuater aña pasá tambe a bestèl ambulans nobo direktamente serka e fabrikante Wheeled Coach. Esaki a tuma lugá depues ku a sera Curaçao Emergency and Medical Services (CEMS) i a lanta Fundashon Kuido di Ambulans ku ta kai direktamente bou di gobièrnu di Kòrsou.
Kosto di ambulans
Segun presidente di Fundashon Kuido di Ambulans, Geraldine Christina, un di e motibunan pakiko a disidí di kumpra e kuater ambulansnan serka e fabrikante i no serka e diler lokal ta e aspekto di kosto. Kumprando direktamente serka Wheeled Coach a logra haña un deskuento kaminda kada ambulans a bin kosta gobièrnu di Kòrsou 108 mil dòler.