Foto: Ariën Rasmijn
ORANJESTAD — Un manifestacion di Grupo di 7 hunto cu oposicion dilanti Bestuurskantoor a escala den lantamento baricada y confrontacion cu ME.
Alrededor di 500 hende a duna oido na Grupo di 7 pa sali protesta. E grupo a aglomera den area di parke Wilhelmina pa asina coy caminda pa Bestuurskantoor. Miembronan di Grupo di 7 hunto cu lider di sindicato Topa René Bernabela tabata deliberando nan plan di accion hunto cu comisario di polis Trudy Hassell cu na momento ey tabata actua como intermediario.
Den discusion aki a sali na cla cu Grupo di 7 tabata kier pa prome minister Mike Eman sali for di oficina di gobierno y tende nan. E biaha aki nan no tabatin un manifiesto pa entrega ya cu esaki den pasado segun nan no a duna resultado. A haya di compronde for di comisario Hassell cu prome minister no tabata na Bestuurskantoor y cu su suplente lo no sali si no tin un manifiesto pa entrega. Hassell a sugeri pa e grupo asigna un delegacion pa asina ora nan yega na bestuurskantoor tin e posibilidad pa nan subi y papia cu gobernantenan presente, pero e idea aki no a cay bon. Na final e lidernan di e manifestacion a dicidi pa tuma un decision riba kico pa haci ora nan yega na Bestuurskantoor.
Foto: Ariën Rasmijn
Ambiente hostil
Ambiente entre e manifestantenan ainda tabata trankil ora nan a sali cana rumbo pa Bestuurskantoor. Pero na altura di parlamento un persona a tira un klapchi pisa na entrada di e edificio. Manifestantenan rabia a mustra riba un homber bisti den un camisa blauw cu blanco, bisando cu e no tabata pertenece na e grupo di manifestantenan. A topa cu e persona aki na entrada di bestuurskantoor. E tabata nenga profusamente di a tira algo y a drenta e edificio sin niun intervencion di polis. For di momento aki ambiente di e manifestacion a cambia na uno hostil. Manifestantenan no tabata di acuerdo cu e manera con polis a pone baricada y na dado momento situacion a escala di tal forma cu nan a lanta e baricada y polis a saca klop inmediatamente. Boternan di awa y obhetonan tabata wordo tira y un señora di edad a haya algo tira na su cabes y a keda herida.
Foto: Ariën Rasmijn
Prome minister a sali
Situacion a sali mas for di man ora na un manera relampago prome minister Mike Eman a sali, acompaña pa un grupo incluyendo entre otro ministernan. Eman a yega serca di e manifestantenan pero ora nan a cuminsa gare, su grupo a hale atras y mesun repentino cu nan a sali, nan a drenta bek den Bestuurskantoor. Despues di esaki Mobiele Eenheid di polis a yega pa purba haya control riba e situacion.
Poco despues, prome minister Eman y su delegacion a baha y sali afo atrobe. Eynan un intercambio a tuma luga entre Bernabela, miembronan di Grupo di 7 y prome minister. Grupo di 7 basicamente a demanda pa gobierno entre revoca e hisamento di tarifa di coriente cu a anuncia. E intercambio a termina y bou hopi gritamento y tiramento di boter prome minister Eman y su ministernan a drenta bek oficina di gobierno. Segun informe, dia 1 di oktober partido MEP tambe lo tin un manifestacion planea.
Foto: Ariën Rasmijn