Ehersisio pa ora di desaster – pòtrèt: Belkis Osepa
KRALENDIJK – Chèns ta grandi ku Boneiru mester di ayudo di paisnan rondó di dje den kaso di un desaster na su aeropuerto. Direktor Les LaPlace di Bonaire International Airport (BIA) ta bisa ku ta importante pa ya kaba hasi e palabrashonnan nesesario ku servisionan di ayudo estranhero di por ehèmpel Kòrsou, Aruba òf Puerto Rico. “E kos aki ta fuera di e responsabilidat di nos aeropuerto. Sí sosodé un desaster, lo mester di ayudo di afó.”
LaPlace ta mira kontentu bèk riba un ehersisio grandi ku a tuma lugá djaweps último, kaminda aeropuerto Flamingo a tèst su plan di kombatimentu di desaster aéreo. E ehersisio a tuma lugá den koperashon ku diferente servisio di ayudo i instansianan ku a asistí durante e simulashon di un desaster ku avion. “E ehersisio a bai bon i a demostrá ku nos plan di kombatimentu di desaster ta funshoná. No tabata tempu pèrdí.”
Belkis Osepa den kombersashon ku Nilo Emerenciana i Les LaPlace
Mehorashon
Despues di evaluashon di e simulashon Nilo Emerenciana kordinador di e ehersisio a bisa ku ya a diskutí riba e puntonan ku mester mas atenshon i mehorashon den kaso di un disaster aéro. E tópiko di komunikashon entre aeropuerto i e diferente servisionan di emergensia i gobièrnu a bin dilanti. Ta e intenshon pa yega na un sistema di komunikashon mihó. “Tambe ta asina ku kada un dje servisionan mester traha riba nan propio plan di kombatimerntu di desaster i no pensa lógiko mas na momentu di un kalamidat. Tur senario mester ta kla pa asina tin un prosedura standart, ya ken ku ta por sigui e prosedura.”
Foto: Belkis Osepa
Tambe e falta di sufisiente material i sufisiente médiko pa yuda riba e pista mester di atenshon, Emerenciana ta bisa. Loke tin awor no ta sufisiente pa akapará tur hende embolbí den un desaster aéreo. Mester analisá e akohida ku servisionan di ayudo por duna den kaso di un kalamidat aéreo. Durante e simulashon supuestamente un Boeing 737 a aksidentá riba pista, kibra na pida i sende na kandela. LaPlace: “Tabatin na total sinkuenta hende abordo. Nos mester puntra nos mes: kuantu ambulans nos tin i kuantu kama den hòspital nos tin na disposishon? Ei falta algu.”
“Por ta asina ku den kaso di un aksidente aéreo riba bo pista di aterisahe, lo no por usa e pista aki”, segun LaPlace. “E ora ei nos mester pensa riba servisionan di helikopter. Tin sierto palabrashonnan ku otro islanan, pero tòg bo mester tene kuenta ku un kaso serio.”
Outor Belkis Osepa