Lugá kaminda ta dump sushi ílegal – potrèt: Belkis Osepa
KRALENDIJK – Bonerianonan mester bira konsiente pa nan mes tene nan isla limpi. E kambio di komportashon ta logra solamente ku konsientisashon, asina Elvis Cicilia di e Servisio di Limpiesa di Boneiru (Selibon) ta bisa. Mas ku sinku shen hende a yuda ku e akshon di limpiesa djasabra último den kuadro di e evento World Clean Up Day. Pero akshon di limpiesa só no ta yuda, sin e aporte di siudadanonan mes.
Koriendo rònt Boneiru ta mira aki aya mini lèntfel, kaminda siudadanonan ta depositá nan sushi ílegal. Tambe kant’i kaminda tin hopi sushi lòs. Si kore den outo poko poko por wak kuantu bòter di serbes ta bentá kantu di kaya.
Potrèt: Belkis Osepa
Mentalidat
Selibon ta tene akshonan di limpiesa, pero ta envoká tambe hopi riba konsientisashon pa trese kambio den mentalidat di Bonerianonan, segun Cristen Cranston enkargá ku relashonnan públiko di Selibon. Ku avisonan den medionan di komunikashon i spòtnan na radio e servisio ta purba mishi ku e sentimenut di siudadanonan. “Serka nos hendenan mester pone énfasis riba e sentiment pa nan por komprondé I kambia nan komportashon”, asina Cranston ta bisa.
Durante e akshon di limpiesa den kuadro di World Clean Up Day, a konsentrá riba e problema di sushi lòs den medio ambiente, manera riba kaya, na bich i den mondi. Tin hende ku ta zwai nan bòter di serbes trankil for di outo. Tin lugá alehá kaminda por haña sakunan di sushi di kas kompletu bentá den mondi. Esnan ku a hasi esaki no a hasi uso di e manera responsabel pa deshasí di su sushi.
Elvis Cicilia i Cristen Cranston a hasi un rekorido kòrtiku rònt Boneiru pa mustra e problema di sushi lòs na e isla.
Outor Belkis Osepa