Diputado Chris Johnson (d) i kabes di skol nobo Anton Hermans – potrèt: Hazel Durand
THE BOTTOM – Despues ku tres miembro di direktiva di e úniko skol di enseñansa sekundario na Saba, Saba Comprehensive School (SCS), a baha, diputado di enseñansa Chris Johnson a anunsiá formashon di un Educational Task Force (ETF).
Mira di tempu e skol tin problema den direktiva di skol i ku e kantidat di dosente. Na aprel e skol a kita kuater dosente i a bin hañ’é den kompromiso ora dos otro dosente a kita pa solidaridat. Te na yüni numa e skol a buska remplaso. Kontinuamente e Task Force mester hèndel problema.
Educational Task Force
Den ETF ta sinta e direktor nobo Anton Herman di Hulanda, dos eksperto di enseñansa di e konseho di VO di Hulanda i Johnson. E Task Force tin sinku meta. Asina e miembronan di ETF mester pèrkurá pa stabilidat den enseñansa di Saba, investigá e trabou di Task Force di dos aña pasá, evaluá e nivelnan akadémiko aktual i investigá e maestronan i mayornan den e Konseho Konsultivo di Partisipashon. Ademas mester kontrolá e statutonan i ETF ta responsabel pa kompilá e rekomendashonnan ku lo presentá na Ministerio di Enseñansa i konseho insular.
Mester hasi un tiki lihé ku e upgrade di enseñansa na Saba. Na 2016 tur skol den BES mester kumpli ku e kalidat básiko di Hulanda. Ministerio di Enseñansa, Kultura i Siensia (OCW) di Hulanda a pone seis mion dòler disponibel pa atraé i mantené dosente riba islanan BES.
Statutonan
Saba Educational Alliance, ku a lanta despues ku a kita e dosentenan i e direktor anteriormente a boga den un karta na gobièrnu insular pa un direktiva nobo di skol. Tambe nan ke pa evaluá e statutonan ku ta na vigor for di den tempu di Antia Hulandes di nobo. Pasobra esakinan ta duna e direktiva e derechi kompleto pa skohe miembronan nobo di direktiva, inkluso nan mes. E Alliance a ekspresa e mésun deseonan den un karta na sekretario di estado Sander Dekkers. Saba Educational Alliance ta kere ku pa motibu di e preshon ku nan a pone, e direktiva di skol a baha siman ku a kaba. “Nos a logra nos promé meta.”
Johnson ta bisa ku e selekshon di persona pa un direktiva di skol nobo ta depende di e evaluashon di e statutonan. E diputado ta avisá ku Alliance no por insinuá un tumamentu ofer di e skol. E ta bisa ku e idea ta pa envolvi tur stakeholder – mayor, dosente, studiante i hende den komunidat – den e diskushonnan tokante futuro di e skol.
Kontroversia
“Realidat ta ku e aña di skol nobo a kuminsá ku un direktor nobo i un grupo nobo di dosente. E hendenan aki no tabata envolví den desishonnan bieu di e skol. Mi ta haña ku nos mester duna nan un bon biní i no mester rondoná e skol ku kontroversia. Ta parse manera tin hende ta usa e skol pa nan propio agènda polítiko i metanan personal.” E diputado a pidi e direktor i dosentenan nobo despensa. “E ambiente hostil na skol no ta reflehá e komunidat di Saba.”
E ekspertonan di e konseho di VO ta yega Saba dia 6 di òktober, Dia Mundial di Dosente. “Nos lo pèrkurá pa tin sufisiente espasio i transparensha pa input di mayornan, dosente i otro stakeholder”, Johnson ta bisa.
Outor Hazel Durand