Rocky Emers ku su planchinan – foto: Belkis Osepa
KRALENDIJK – Gobièrnu di Boneiru pa medio di su servisio di Agrikultura, Krio di Bestia i Peska (LVV) ta pone for di awó awa di kloaka purifiká disponibel pa kunukeronan usa pa nan plantashon i krio di bestia. Esaki ta parti dje proyekto di agrikultura finansiá den kuadro di e proyektonan di Inisiativa Soshal Ekonómiko (SEI) pa stimulá desaroyo rural i agrikultura duradero.
Naturalesa di Boneiru tin skarsedat di awa. Dor dje sekura kabritu i otro bestianan ta pasa miseria. Pa medio di e proyekto di SEI, LVV i kunukeronan na Boneiru por usa diariamente mil kuater shen kúbiko di awa purifiká ku ta sali for di e instalashon di purifiká awa i drenta pa medio di pipanan den un tanki grandi riba tereno di LVV. LVV ta usa e awa pa planta kuminda pa bestia i tambe pa nan plantashon di fruta i bèrdura.
Vishon
Djaluna a inisiá parti di e proyekto di agrikultura di SEI. Tambe tabata inisio di e programa di desaroyo di kunuku i e futuro sentro pa agrikultura duradero. Raymond ‘Rocky’ Emers ku tabata 18 aña hefe di e anterior servisio di LVV ta satisfecho i orguyoso. “Mi a kumpli ku mi vishon ku mi tabatin for di chikí. Mi vishon ta pa nos mes planta parti di nos kuminda.”
LVV ta sai simia, bende simian i tambe bende planchi di bèrdura manera entre otro sèlder, papaya, yambo, warmoes, siboyo largu i kòmkòmer salada. Emers: “Nos ta bende dos planchi pa ún doler. Tur dia nos ta bende. Nos ta sai i mesora e planchinan ta bai.”
Eksterior
Emers ta haña ku e interes pa planta mester oumentá. Loke a sosodé delaster simannan kaminda no a haña sufisiente fruta i bèrdura for di Venesuela lo no a bira problema si na Boneiru mes ta produsí sufisiente, asina Emers ta sigurá.
Zarzinio Josephia Foto Belkis Osepa
Zarzinio ‘Zarpin’ Josephia (29) ta kome di su mes tera. Su mensahe pa kunukeronan ta: ‘no deskurashá!’ Speshal ora ladron bishita bo kunuku i bai ku kosecha òf bestia. Zarpin ta kunukero i tin su mes negoshi Zarpin LVV Paradijs na Kaminda pa Lac. Zarpin tambe por bai hasi uso di e awa purifiká pa su kunuku. “Tin hopi hende na Boneiru ta give up lihé ora ladron bishita nan kunuku. Nan ta bandoná kunuku i a lo largo ta e ladron ta gana. Ami ta bisa nan a kohe kos awe, pero no entregá, sigui pa dilanti.”
Algun aña pasá a hasi un inventarisashon i a registrá ku Boneiru tin 374 kunuku aktivo kaminda ta planta maishi i tambe ta kria kabritu i karné. Tambe tin 47 kunuku ku ta planta bèrdura. E kantidat di kunuku lo no tin sufisiente kosecha pa Boneiru, segun Emers. Pero e ta kere ku e stimulashon speshal pa medio di e proyektonan ku a inisiá, e kantidat lo krese.
Outor Belkis Osepa