Potrèt: Ariën Rasmijn
ORANJESTAD — Parlamento a aproba e ley pa standardisa e color blauw di base di bandera nacional di Aruba. Cu e ley aki ta yega un final na 18 aña di purba yega na un color fiho hancra den ley pa loke ta e blauw di bandera Arubiano.
Ariën Rasmijn den combersacion cu Roy Brete, hefe di Bureau Interne Dienst (BID)
Desde 1 di januari 2015 e color aki su codigo ta bay ta PMC 279C. Parlamento tambe a vota unanimamente pa un amienda den e ley cu ta mantene e definicion original di e color bou nomber di ‘Larkspur’ como e color oficial banda di esun cu e codigo nobo, a pesar cu ‘Larkspur’ como color no ta existi mas. Adicion aki ta mas tanto uno simbolico cu cual gobierno kier a duna oido na inquietud di parlamentario Glenbert Croes di MEP. Un mocion di MEP pa pospone votamento te despues cu a consulta pueblo riba e color blauw di bandera a keda rechaza.
Parlamentaria Xiomara Ruiz-Maduro (MEP) y minister di Cultura Otmar Oduber den pleno discusion riba e color di bandera di Aruba – potrèt: Ariën Rasmijn
‘Larkspur’
E definicion di e color blauw den e ley original di 1976, pues e color ‘Larkspur’ den e buki antiguo di registro Ingles di colornan di bandera, no ta aplicabel mas. Awendia ta uzando un diferente codigo pa defini colornan. Segun e ley di 1976, ‘Larkspur’ ta e mesun color blauw cu Nacionnan Uni ta aplica pa nan bandera. Nacionnan Uni mes ta uza e color 279C di sistema Pantone, cu ta aproxima ‘Larkspur’ pa 92 porciento. Un comision consistiendo entre otro di ambtenaarnan di Bureau Interne Dienst (BID) cu ta esun cu normalmente ta cumpra e banderanan di Aruba pa edificionan di gobierno a purba bou diferente gobierno di diferente signatura pa yega na un co nclusion pa cu e problematica aki.
Historia confuso
Bandera di Aruba riba dje tin un historia confuso pa loke ta su prome presentacion y hisamentento den Wilhelmina Stadion na 1976. Ta asina cu a pesar cu den e ley di bandera e color ‘Larkspur’ tabata defini, ambos e bandera cu a wordo presenta oficialmente na pueblo y esun cosi cu a wordo hisa den stadion ta di un color diferente. Durante e debate, fraccion di MEP tabata di opinion cu pa yega na un desicion final mester consulta cu pueblo, ya cu pa gran parti nan lo ta custumbra cu e otro colornan cu tabata wordo uza. Tambe tabata specula cu kizas e cambio di color lo tin di haber cu posibel bentaha pa e compania di imprenta cu lo tin vinculo familiar cu minister di Cultura Otmar Oduber.
‘Alma di nos pais’
Minister Oduber di su banda a contesta enfaticamente cu e nunca lo bay hisa un bandera ‘cu color falsifica’. E mandatario a indica cu no solamente na Aruba mes den temporada di 18 di maart pero tambe na hopi caminda den exterior a mira bandera di Aruba cu e color blauw cu no ta coresponde, y esaki mester cambia na un situacion na unda cos ta cla y tur bandera tin mesun color. Oduber a bin cu un di e 14 banderanan cosi original y e registro bieu Ingles pa ilustra su puntonan. Segun minister Oduber ta trata aki di ‘alma di e pais’. Debate aki a dura ocho ora largo y tabata conoce hopi tiramento di palabra entre e dos partidonan grandi.
Autor: Ariën Rasmijn