Sala deportivo resien renová ta yen di frus atrobe – José Manuel Dias
WILLEMSTAD – Durante e renovashon di e sala di deporte di Sentro Deportivo Kòrsou (SDK) no a tene debido kuenta ku e aspekto di salpeter i ya kaba por mira koroshon na gran eskala riba práktikamente henter e edifisio.
E renovashon a keda konkluí apenas dos aña pasá i por mira klaramente ku a usa materialnan inferior ku no ta resistente na salpeter. Esaki ta pone ku denter di poko lo mester bolbe bai gasta sèn den mantenshon di e sala deportivo aki, lokual no tabata e intenshon.
Falta di sèn
Segun direktor interino di SDK, Vernon Toré, falta di sufisiente sèn a pone ku mester a usa materialnan mas barata lokual tin su konsekuensianan riba e kalidat. “T’asina ku SDK ta risibi un supsidio di gobièrnu pero esaki no ta sufisiente pa kubri tur gastu di mantenshon”. Dor ku no tin sufisiente plaka pa hasi tur e trabounan na tempu, aktualmente tin un atraso hopi grandi den mantenshon di henter e kompleho deportivo.