Polis den accion durante ultimo manifestacion dilanti oficina di gobierno – potrèt: Ariën Rasmijn
ORANJESTAD — Desde cu manifestacionnan ultimamente ta hayando mas y mas un caracter violento, Cuerpo Policial ta bay delibera cu gruponan di manifestante di antemano riba condicionnan pa nan permiso.
Segun alto comisario Dolfi Richardson, esaki kiermen cu e sistema di reglanan cu ta bay cu un permiso lo bay wordo adapta segun palabracion.
Anteriormente por a papia di un maneho di un regla pa tur manifestacion. Pero desde e ultimo protestanan cu a tuma luga dilanti gabinete di gobernador y Bestuurskantoor na unda situacion a sali for di man, Richardson ta haya cu mester por anticipa miho riba confrontacionnan innecesario. For di awo en adelante e kier inclui tur stakeholders den e proceso di yega na acuerdonan fiho pa cu e buena marcha di e accion y siguridad di tur persona envolvi. “Conhuntamente nos tin cu yega na acuerdonan pa asina minimalisa cualkier riesgo cu por tin.”
Permiso pa 1 di oktober
Tin un peticion pa permiso pa tene un manifestacion riba dia 1 di oktober riba mesa di alto comisario Richardson. For di vocero di Polis Lito Laclé a haya di compronde cu e ta bin di Comision Accion Nacional y cu e persona cu lo haya e permiso riba su nomber ta Hendrik Tevreden, un prominente den filanan di partido di oposicion MEP. Peticion aki te ainda no a wordo honra. Alto comisario Richardson ta bisa cu e tin su pensamentonan pa loke ta kico e ta bay propone pa loke ta e reglanan di wega, pero e no kier adelanta riba esaki ya cu ainda tin cu sinta cu tur partido envolvi na mesa.
Rednan social
Alto comisario tambe kier mustra riba postnan cu ultimamente ta wordo poni dor di manifestantenan riba rednan social manera Facebook, bisando entre otro ‘cu lo bay tin guera cu polis’. Segun Richardson esaki ta duna tambe indicacion riba posibel riesgonan cu lo por y e ta enfatisa cu e ultimo cos cu e kier ta un confrontacion entre ciudadanonan manifestando y polis.
Autor: Ariën Rasmijn