Miembro di konseho insular Robby Beukeboom - Potrèt: Belkis Osepa

Miembro di konseho insular Robby Beukeboom – Potrèt: Belkis Osepa

KRALENDIJK – E desishon final si lo tene un referèndem tokante futuro di Boneiru ta kai djárason. Eilandsraad lo reuní e dia ei pa tuma e desishon.

Un proposishon di lei pa organisá i tene e referèndem promé ku elekshonnan lokal riba 18 di mart, ta kla pa entregá, miembro di eilandsraad Robbie Beukeboom di frakshon di PDB ta bisa.

Beukeboom ta haña ku frakshon di PDB a kue e proposishon klab’é sera bon bon. Den e proposishon tin tur punto ku mester regla pa e organisashon i un bon transkurso di e konsulta popular. E mester korespondé na e direktivanan di Nashonnan Uní den un proseso di dekolonisashon. “No tin kompromiso. Un desishon mester kai awor. Lo nominá e proposishon di lei pa vota. E ora ei nos lo tende ken ta pro i ken ta kontra.”

Liña
E trayekto tabata largu. Tin un rapòrt di referèndem i a reservá plaka pa e organisashon pero den polítika bonerianunan tur no ta riba e mésun liña. Tur frakshon den eilandsraad a firma e petishon pa e reunion. Partido di koalishon UPB tambe, pero e partido aki ta keda para ‘riba ku e referèndem no mester tuma lugá promé ku elekshonnan.

Konsenso
Djadumingu tabatin un deliberashon entre algun partido polítiko pa alkansá un konsenso. E deliberashon ku tabata bou di guia di Nòchi Willem di Fundashon Bon Gobernashon no tabatin resultado. Willem a yega di tuma inisiativa kaba den esaki. “Nos tabata keda pegá den e idea di un posibel kumbre ku tur partner sosial. Mi a indiká ku un kumbre asina no ta alkansabel, si ni sikiera polítika no a tuma un punto di bista. Djarason en bèrdat ta e dia di desishon.”

Outor: Belkis Osepa