Potrèt: Ariën Rasmijn

Potrèt: Ariën Rasmijn

DEN HAAG – Korupshon i violashon di integridat na Sint Maarten, problema ku presupuesto na Aruba i pregunta tokante e plannan pa e hòspital nobo na Kòrsou. Tur wowo ta riba minister Ronald Plasterk di Asuntunan Interior i Relashonnan den Reino pa pensa solushonnan rápido. Esaki ta e tópiko di e debate tokante e presupuesto di relashonnan den Reino awe.

Relashoná ku rapòrtnan di integridat na Sint Maarten ku a sali resientemente Plasterk ya kaba a tuma algun medida si. E ta manda un tim spesial Sint Maarten pa yuda kombatí kriminalidat, el a bisa NOS na NPO Radio 1. Tambe e ta bai nombra un wardadó di integridat ku ta bai vigilá bon gobernashon. Plasterk lo haña palabra mas lat awe den e debate.

E opinionnan polítiko tokante e manera aktual ku Plasterk ta trata di hèndel e problemanan ta varia hopi. I esei ta trese konfliktonan di interes den e debate. Kaminda e partidonan di gobièrnu VVD i PvdA ta duna e minister un chèns pa sigui pone òrdu, e partidonan di oposishon manera D66 i PVV ta haña ku tin muchu poko intervenshon aktivo.

Wassila Hachchi di D66 ta yama Plasterk un minister di ‘pleitamentu den reino’. E ke pa bini un reglamento di disputa mas lihé posibel ku por duna un pronunsiamentu tokante e diferenshanan den opinion entre e paisnan. Asina e ta spera ku den futuro huntu por solushoná problemanan mas lihé. Hachchi lo ke pa e paisnan karibense haña mas posibilidat pa trata nan problemanan nan mes promé ku Hulanda intervení. E ta haña ku Plasterk no tin sufisiente vishon riba Reino.

Te na mei di 2015 Sint Maarten segun VVD mes por tuma medida pa solushona problema di korupshon i integridat, André Bosman ta haña. “No mester intervení muchu lihé, pero no muchu lat tampoko. A kaba di bini un gobièrnu nobo i e rapòrtnan di integridat a kaba di sali, mi ta haña ku nan mester haña un chèns.” Kolega den koalishon Roelof van Laar ta mira tur loke no ta bon pero den su spich e ta enfatisá derechonan di mucha. Via un amienda e ke lòs tres mion pa ehekutá e plan di derechi di mucha ku mester ta kla fin di 2014.

Investigashon di integridat
Un investigashon di integridat di gobièrnu na tantu Sint Maarten i Korsou komo Aruba, esei ta loke e parlamentario di SP Ronald van Raak ke. Motibu pa esaki ta ku for di òktober di 2010 e ta prekupá pa ‘strañero gatieru ku ta bira riku mientras ku pueblo mes no ta probechá di e desaroyonan’. Ademas e ke pa investigá Theo Heyliger ku a akusá di a kumpra voto. Tambe Van Raak ta boga pa enfoká lihé riba pobresa den Hulanda Karibense.

Lei di inisiativa di PVV
Sietse Fritsma di PVV durante di e debate ta laga sa ku su partido awe ta entregá un proposishon pa un lei di inisiativa. E proposishon aki mester duna e posibilidat pa saka antiano kriminal for di Hulanda ora nan kometé un delito. Raad van State ta bai wak e proposishon awor i lo duna un konseho. E ora ei numa lo papia mas aleu tokante e proposishon di lei aki. Despues di e lei di Bosman esaki ta un di dos proposishon di lei anto pa limitá yegada na Hulanda di hende di e paisnan karibense di Reino.

E debate ta kontinuá mas lat awe.

Outor Jamila Baaziz