Fin di e reunion despues ku a rechasá e moshon – potrèt: Belkis Osepa

Fin di e reunion despues ku a rechasá e moshon – potrèt: Belkis Osepa

KRALENDIJK – Un referèndem tokante e státùs estatal di Boneiru lo no tuma lugá mas promé ku elekshonnan lokal dia 18 di mart. Un mayoria den eilandsraad a rechasá un moshon pa organisá e referèndem. “Awèl ta elekshon lo bira e referèndem”, miembro di eilandsraad Robby Beukeboom di PDB ta bisa.

A rechasá e moshon ku Beukeboom a entregá ku sinku voto kontra i kuater pro. Asta e miembro independiente Rafael Santana kende diferente be a indiká ku e ta sostené un referèndem, a vota kontra. No ta kla si e referèndem lo bini un dia ainda.

Belkis Osepa ku un relato di e reunion tokante referèndem

Wega
Durante e reunion di eilandsraad ku a dura sigur kuater ora por a ripará bon kla kon, manera kustumber, e diskushon entre koalishon i oposishon a pega sin ke bai ni bini. Akusashonnan tabata skeiru bai bini i de bes en kuando emoshonnan tabata subi haltu. Delantá por a establesé kaba ku e dos gruponan lo no haña un akuerdo. Tòg tabatin un tiki speransa ainda pa motibu di Santana su opinion anterior, pero den sala di reunion el a hala atras.

Oposishon a argumentá pakiko ta nesesario pa tene un referèndem. “E laso direkto ku Hulanda ta desemboká den entrega di nos outonomia na Hulanda”, miembro di eilandsraad Marugia Janga (PDB) ta splika. El a duna un splikashon kronológiko tokante e kurso di e proseso estatal di e isla. “Hulanda tin e outoridat pa tuma desishon pa nos, pasobra nos ta forma parti di Hulanda.”

Den e moshon ku a entregá tur kla kaba tabatin pará ku e referèndem mester tuma lugá riba 10 di desèmber i ku tur hulandes i strañero inskribí ku tin por lo ménos sinku aña ta biba na Boneiru por vota. E opshonnan pa e referèndem lo tabata: independensha, asosiashon liber i integrashon.

Miedu
Oposishon durante su diskursonan tabatin un solo mensahe: Pueblo tin e derecho di ekspresá su mes sin kondishon. “Ta manera e representantenan di pueblo tin miedu di e bos di pueblo”, Clark Abraham (PDB) a bisa. “Nos mester duna pueblo e oportunidat di papia. Nan lo mester indiká nos i reforsá nos posishon durante e negoshashonan ku Hulanda.”

Santana a defendé su posishon nobo indikando ku el a hasi tur loke tabata posibel pa organisá un deliberashon kumbre ku tur partido polítiko i partnernan sosial den komunidat. E kumbre a faya pa motibunan fuera di su alkanse, Santana ta bisa. Nos no por fòrsa un referèndem sin tende tur grupo den komunidat.”

Trayekto di informashon
E kuater miembronan di konseho di e partido di koalishon di mas grandi UPB a vota kontra di e moshon pa tene un referèndem. UPB ta haña ku oposishon ta hunga un wega polítiko. Ramonsito Booi (UPB): “Nan ta gaña pueblo. Un referèndem lo no kambia nada. No ta informá pueblo drechi.”

Diputado James Kroon (UPB) a anunsiá ku lo kuminsá un trayekto pa informá pueblo tokante su státùs estatal. “Ekspertonan di Boneiru i por ehèmpel di Nashonnan Uní tambe mester duna informashon ophetivo den forma di fórùm i workshop.” Kroon ke pa e trayekto di informashon kore pareu ku e evaluashon di e reformashonnan estatal di 10 di òktober 2010.

Outor: Belkis Osepa