Minister Ronald Plasterk durante un debate – potrèt: archivo
DEN HAAG – Tweede Kamer por lo pronto ta satisfecho ku e medidanan konkreto ku minister Ronald Plasterk di Asuntunan Interior i Relashonnan den Reino a anunsiá durante un debate tokante e presupuesto di Relashonnan den Reino.
E meta di mas importante di e debate tabata pa mehorá integridat di gobièrnu di Sint Maarten. Plasterk a indiká ku e lo diskutí un plan di akshon p’esaki den e próksimo konseho di minister di reino. Un parti importante di e plan ta nombramentu nobo di un supervisor di integridat.
E supervisor ta raportá na konseho di minister di reino tokante mehorashonnan ku gobièrnu di Sint Maarten mester implementá segun e konsehonan di e rapòrtnan krítiko di integridat. Ademas Hulanda lo pone un tim disponibel pa hèndel kriminalidat di hende di klase sosial haltu i lo ofresé fortifikashon di wardakosta, duana i Recherche Samenwerkingsteam (RST).
E petishon di e miembro di SP Ronald van Raak pa eksihí un investigashon di e partido UP di Sint Maarten i su lider Theo Heyliger ta bai muchu leu pa Plasterk. E ta mustra ku Ministerio Públiko na Sint Maarten mes mester skohe esaki i e no ta rekomendá un moshon ku Van Raak ta entregá tokante di esaki.
Areglo di disputa
E tempu ku ta bini Plasterk lo duna atenshon na e areglo di disputa ku mester solushoná diferensha di opinion entre paisnan den reino. E ta spera ku kuminsamentu di otro aña e ta haña akuerdo ku tur pais konserní tokante e derechonan i debernan di e órgano ku mester bai duna pronunsiamentu tokante konfliktonan den reino.
For di den zomer e paisnan karibense ta di akuerdo ku mester bini un komishon masha lihé pa resolvé konflikto. Esaki pa motibu di e intervenshon di Hulanda na Aruba den e asuntu di presupuesto i na Sint Maarten pa motibu di e investigashon di integridat. Ademas a inkorporá e areglo aki den lei for di oktober 2010 ke men e mester bini porfin.
Si no logra haña un akuerdo kuminsamentu di otro aña gobièrnu hulandes di tur manera lo duna su vishon kon duna forma na un areglo asina. Te awor semper a resultá di ta difísil pa yega na un areglo den disputa kaminda tur hende por ta di akuerdo. Plasterk, ora a puntré, a bisa ku Hulanda ke pa e leinan di reino kai pafó di e areglo, ku Hulanda tin un interes di mayoria i ke pa e komishon tin sufisiente konfiansa hulandes, manera por ehèmpel di Raad van State.
Aruba
Plasterk ta spera di risibí un presupuesto kambiá di Aruba djabièrnè awor. Pa promé be despues di un zomer tumultuoso yen di konflikto entre konseho di minister di reino i Aruba e ta koutelosamente optimista tokante e posishon finansiero di Aruba. Pero e prekupashonnan tokante e debe estatal di e isla ku a bira dòbel masha lihé (di 40 pa 80 porshento di e Produkto Bruto Interior den seis aña di tempu) ta keda. “Mester warda mira awor. Nos ta riba dje”, segun e minister.
Kòrsou
Na Kòrsou ta kriminalidat i inseguridat tin Plasterk prekupá. E ta kontentu ku e por duna yudansa ora Minister Nelson Navarro di Hustisia pidi. E preguntanan ku tin tokante di e riesgona pa fiansanan rònt di e hòspital nobo e ta rechasá. Segun e, College financieel toezicht (Cft) ta vigilá e presupuestonan p’esaki bon.
Outor: Jamila Baaziz