Stèntnan di suvenir rondó di Plasa Nobo – pòtrèt: José Manuel Dias
WILLEMSTAD – Promé ku fin di e aña aki lo kita tur stènt di suvenir ku tin stashoná rondó di Plasa Nobo i lo trasladá esakinan bèk pa Waaigat i Parke Wilhelmina. Asina city supporter, Henny Reinilia, enkargá ku supervishon di sentro di siudat a duna di konosé.
Plasa Nobo lo mester a fungi komo un sitio temporal te ora kaba ku renovashon di Parke Wilhelmina. Entretantu ya tin kasi dos aña ku a renová e parke aki i te ainda e stèntnan no a bai bèk na nan sitio. Dor ku a permití e stèntnan di keda, e bendedónan ku tabata stashoná na Waaigat tambe a bin pone nan stèntnan dilanti di Plasa Nobo.
Un reportahe di José Manuel Dias
No tin pèrmit
“Kaminda nan ta aworaki, nan no tin pèrmit pa para einan”. Reinilia ta konsiderá esaki komo un negligensia di parti di Polis, ya ku ta e instansha aki ta esun enkargá ku kòntròl i otorgamentu di pèrmit. Banda di e echo ku no tin pèrmit, e stèntnan ta forma un peliger tambe pa públiko ya ku nan ta konstruí di materialnan no adekuá.
Bendedónan no ke bai Waaigat
E bendedónan ku a bini for di Waaigat no ke bai bèk einan. “Einan nos ta muri di hamber, nos no ta bende nada”. E bendedónan no ke pa separá e stèntnan for di otro i ta boga pa bini ku un lugá sentral kaminda tur bendedó por bende nan produktonan ku turistanan.
Outor José Manuel Dias