Bishitantenan na manifestashon kultural Foto Belkis Osepa
KRALENDIJK – Bonerianonan mester informá nan mes bon i mustra interes propio pa formulá un vishon tokante futuro di su isla. Esei ta e mensahe durante e promé manifestashon kultural di e fundashon Nos Ke Boneiru Bèk.
E kantidat di bishitante pa presensiá e manifestashon kultural na e tereno di Nort Salinja no tabata hopi. Reim sinkuenta bishitante a bai pa skuchaa i mira un pelíkula di historia di kolonisashon, diskurso, deklamashon, kanto i baile. Apesar dje echo ku e referèndem konstitushonal no ta tuma lugá mas promé ku elekshon, tòg presidente James Finies a kontinuá ku su enkuentro informativo. “Pueblo mester informá nan mes i no laga polítikonan kore ku nan ku palabranan bunita i informashonnan no korekto”, segun opinion di Finies.
Demokrasia
E bishitantenan ta positivo riba e kampaña di informashon di Nos Ke Boneiru Bèk. Mayoria di esnan presente a ekspresá nan malkonentu tokante e posishon estatal di Boneiru. “Boneiru a bai atras; no ta respetá nos opinion i demokrasia”, asina un hende hòmber di edat ta bisa. Den diferente reakshon ta tende e lema di e fundashon Nos Ke Boneiru Bèk: “Nos ke nos Boneriu berdaderamente bèk.”
Venota Coffie di 79 aña ta skèrpi: “Mi a bin tende, paso nos no por sigui biba un bida asinaki. Nos mester ta para riba nos mes pia. Awor makamba ta manda riba nos, kobra nos belásten i manda hopi plaka di belásten Hulanda. Anton an ta bisa ku a bin yuda. Mi no ta satisfecho.”
Gabriel van Arneman Foto Belkis Osepa
Vishon
Kolumnista Gabriel van Arneman ta sigui e desaroyonan na Boneiru di aserka. E ta analisá e diskushonnan relashoná ku e status estatal di Boneiru i ta pone tur kos den perspektiva. Pueblo Boneriano mester tuma paso, Van Arneman ta haña. Nan mestr informá nan mes I bira konsiente di su posishon estatal. “Boneiru mester disidí un da e ta pará i unda e ke bai. Kiko ta vishon di Boneiru? Nos por keda lamentá tokante tur loke a pasa, pero na dado momentu nos mester wak e situashon ku nos ta aden, formulá un vishon tokante futuro di Boneiru.”
Van Arneman ta rekonosé ku tin hopi komunikashon robes entre e diferente aktornan den e kuestion di desaroyo estatal. Pa e motibu ei e ta boga pa un komunikashon klaro i transparente. E tres aktornan manera gobièrnu, gruponan sosial i e pueblo tin e responsabilidat pa tuma inisiativa i informá e pueblo bon, Van Arneman ta haña. “Pero loke ta mas importante ta e pueblo ku mester bisa loke e ke.”
Outor Belkis Osepa