Etienne Meyer (r), Elton Jones i Edwin Gumbs (dr) – potrèt: Today / Hilbert Haar

Etienne Meyer (r), Elton Jones i Edwin Gumbs (dr) – potrèt: Today / Hilbert Haar

PHILIPSBURG – Komo reakshon riba e luchanan polítiko na Den Haag, na Sint Maarten a lanta e movementu Siudadano pa Demokrasia Berdadero. E lidernan ta Etienne ‘Toochie’ Meyers, Elton Jones i Edwin Gumbs. A elegí Meyers su ruman hòmber Franklin pa e partido UP di Theo Heyliger den e parlamento nobo.

Djaluna awó e movementu ta organisá un marcha di protesta pasífiko pa e edifisio di gobièrnu. E meta ta pa pone un fin na e insultanan ku kontinuamente ta manda pa Sint Maarten, espesialmente di parti di e parlamentarionan Ronald van Raak i André Bosman. E movementu ke demonstrá ku lo no tolerá pa Hulanda mete den polítika lokal.

Disgusto
Espesialmente e yamamentu di van Raak pa pèrsiguí lider di UP Theo Heyliger a kousa hopi disgusto. Riba Facebook a aparesé un potrèt di ‘tata di patria’ Claude Wathey ku e teksto: “Ke men e hulandesnan ta bini aki bin pèrsiguí mi ñetu? Laga mi duna nan un kaluroso bonbiní estilo Sint Maarten.” E potrèt – klásiko den famia – ta mustra Wathey ku brel di solo bistí ta hisa su dede di meimei.

“The Old Man” Claude Wathey ainda ta inspirá imaginashon – potrèt: Facebook

“The Old Man” Claude Wathey ainda ta inspirá imaginashon – potrèt: Facebook

Sanger
E tres hòmbernan di Siudadano pa Demokrasia Berdadero pa e okashon aki a bisti na T-shirt blanku shushá ku imprenta di planta di man kòrá. “Esakinan ta representá sanger di nos antepasadonan”, Meyers ta bisa. Elton Jones a bisa ku loke a papia na Den Haag tokanta di Sint Maarten inaseptabel i a bisa ku no ta Hulanda ta disidí ken ta goberná Sint Maarten. “Nos ke manda un mensahe bon kla, esta ku dianan di kolonialismo a pasa.”

Mei 1969
Un poko menasante Meyers a añadí ku Sint Maarten “no tin e intenshon di bai den e direkshon di 30 di mei 1969.”

Outor: Hilbert Haar