A sentensiá Huggins pa 20 luna detenshon hubenil, pero despues di seis luna el a sali liber a trobe – potrèt: Anneke Polak
ORANJESTAD – Servisio di Imigrashon i Naturalisashon di Hulanda Karibense (IND CA) a deklará un habitante di 18 aña di Sint Eustatius persona non grata. Por deportá e hóben, De-Juan Huggins, un ora pa otro pa St. Kitts.
Na desèmber di aña pasá, ora e tabatin 17 aña ainda, a sentensiá Huggins pa violashon. Na yüni di e aña aki el a sali liber i despues mésora el a risibí un karta di IND ku e notisia ku lo deklar’é persona non grata. No opstante protestanan unitmanager di IND Peter de Graaf, na nòmber di sekretario di estado di Seguridat i Hustisia Fred Teeven, a husga djaluna ku Huggins no ta bonbiní mas na Sint Eustatius. Djamars a entregá e hóben ku a nase na St. Kitts, e dekreto.
Interes di estado
De Graaf ta skibi den e dekreto ku “e interes di estado pa deklará e personá konserní persona non grata, mirando e daño ku el a hasi na orden públiko i pa kua el a haña kastigu di prizòn, ta mas importante ku e sirkunstanshanan ku ta kumbiní e persona konserní, entre otro e durashon di su estadia na Sint Eustatius di diestres aña”. Huggins te ainda ta keda ninga ku tabata trata di violashon.
Peliger pa seguridat nashonal
For di e edat di kuater aña e hóben ta biba na Statia, kaminda el a lanta seka su wela. Su mayornan i otro famianan ta biba na St. Kitts ainda, e ta mira nan dos be pa aña ora e bai einan ku fakansi. Konsultante Cristie van de Sande di SOS Statia ta yuda Huggins den e kaso. “Te asina leu ku mi sa esaki ta e promé kaso di deklarashon di persona non grata den historia di Statia. Banda di e echo ku e desishon aki ta desastroso pa e hóben i su wela, pa mi esaki ta un dia skur pa Statia tambe. IND di Hulanda Karibense ta keda sin demonstrá ku e persona konserní ta forma un peliger pa òrden públiko òf seguridat nashonal.”
Dia 27 di ougùstùs durante di un interogashon di IMD su wela ta deklará: “Mi ke pa e keda. Su mama no ta buska su drechi i t’ami ta krié fo’i na chikitu. Su mama a pas’é pa mi yu hòmber dia e tabatin tres luna. Esaki a pas’é pa mi yu muhé, pero ora esei a sali na estado ami a haña Juan. Dun’é un chèns mas.”
Reclassering
Den un rapòrt di reclassering di 30 di yüni di e aña aki ku trahadó James Williams a skibi, lo tin pará ku Huggins no konosé niun hende na St. Kitts, ku su famianan ei no ke tum’é i ku e tin miedu di bai biba St. Kitts. Anteriormente Williams no ker a reakshoná riba e kaso ‘pa motibu di privasia di e kliente’. Pa e mesun motibu IND CN no ke reakshoná riba e kaso.’
“E persona konserní a indiká ku e ta bai St. Kitts bèk pa fakansi dos be pa aña, ku semper e ta keda seka famia i ku e ta topa demas famia tambe. Konkluyendo e rapòrt aki (di reclassering, red.) no tin e peso ku esun konserní ke dun’é”, e sekretario di estado ta bisa den e dekreto.
Djárason lo tene un oudiensia relashoná ku e rechaso di un pèrmit di estadia pa un tempu indefiní. Pero asta si duna e pèrmit di estadia aki esaki lo no hasi e deklarashon di persona non grata ilegal, De Graaf ta konkluí.
Outor: Anneke Polak