Shanny ta para dilanti e kas unda ela krese – potrèt: Leoni Leidel-Schenk
WILLEMSTAD – Sink’or di mardugá Shanny Granville-Bitorina ta hunta pan den Seru Fortuna. No pa su mes yunan, sino pa dos mucha hòmber di den bario. Komo boluntario den sentro di bario di Seru Papaya e ta sinti su mes responsabel pa e dos mucha hòmbernan ku, no opstante e situashon difísil na kas, ta bai bon na skol. E pan ta e mes ta kumpra.
Ta manera trabou di bario den un bario ku a keda atras ta espesialmente trabou di bienhechor manera Shanny. Despues di 10-10-‘10 kombatimentu di pobresa a bai pèrdí segun Hayes Nicholls, ku añanan largu tabata envolví den trabou sosial den e bario. “E puesto di minister di SOAW (Asuntunan Sosial, Labor i Bienestar) for di òktober di 2010 ta esun di mas importante pero kada tantu luna tin un minister nobo. E problema di mas grandi ta kontinuidat den gobièrnu.”
Unda e plaka ta?
Kombatimentu di pobresa ta un tarea di gobièrnu, pero SOAW for di desmantelashon di Antia ta sufri di trokamentu di minister i direktor di e sektor. “Despues di e desmantelashon lo a bini mas plaka pasobra Kòrsou no tabatin nodi di kuida e tres otro islanan mas. Unda e plaka ei a keda? No den kombatimentu di pobresa”, Nicholls ta bisa.
Shanny ta pasa den un kaya kolorido den Seru Fortuna. E bario ta mustra manera tin un bon ambiente; hopi hende ta sinta dilanti nan kas den stupi i hóbennan ta hasi kenshi riba baiskel. Tòg no por skonde e pobresa pasobra tin kasita ku tin mei dies hende di pròp den nan.
Mas tantu punto
Kasi henter Seru Fortuna ta konsistí di kas ku Fundashon Kas Popular ta ofresé. “Ademas e habitantenan ta e hendenan ku tin ‘mas tantu punto’ “, Shanny ta splika. “Hende ku hopi punto ta hende ku hopi problema; a pusha nan huntu den un bario i laga nan pa nan kuenta. E bario mes wak kon ta hasi ku nan.”
E trabou di Sentro Papaya ta kompletamente den man di boluntario. Shanny mes a lanta den Seru Fortuna. Despues di su estudio i e tempu ku el a pasa na Hulanda el a bini Kòrsou bèk. Niun momento so e no a pensa di bai biba otro kaminda. “Aki ta mi kas.” Ku orguyo e ta mustra e kasita koló ros kaminda el a lanta. Su mayornan ketu bai ta biba einan.
Saka potrèt
Shanny lo tin masha gana di traha pa e sentro di bario fulltime pero no tin plaka pa esaki. Masha debésenkuando el a yega di risibí bishita di un minister den bario. Ta difísil pa determiná si e bishita tabata mas ku solamente un oportunidat pa saka potrèt. Nan ta masha entusiasmá pero despues nada no ta sosodé.” Entretante e resibu di koriente di e sentro di bario ku hopi hóben ta bishitá ta sigui subi sin ku por pag’é.
Muchanan ta kana drenta den e kas di krisis un ratu pa huí di nan situashon na kas – potrèt: Leoni Leidel-Schenk
Un otro fundashon ku mester lucha pa finansá su eksistensha ta Fundashon Bo Mes Forsa. “Ora tin hamber mester kome promé”, presidente Edward Melfor ta bisa. “Despues nos por sigui wak edukashon i buskamentu di trabou. Melfor ta den e ‘kas di krisis’ nobo di Bo Mes Forsa. Unu unu e muchanan ta kana drenta den e kas di krisis un ratu pa huí di nan situashon na kas, haña un plato di kuminda kayente i risibí ayudo ku nan hùiswèrk.
Su ruman muhé Yvette ta e alma i kurason di e fundashon. Bo por hañ’é tur kaminda na Kòrsou. E ta parti pakete di kuminda kaminda tin mester i e ta stimulá hende muhé hóben pa buska un edukashon òf un trabou.
Pidi limosna
E fundashon ta pasa trabou for di dia ku e plakanan di AMFO a para. “Nos a bai gobièrnu i nos a haña un supsidio di un be so. Di e plaka ei nos a hasi e pagonan ku tabata atrasá. Pero awor nos mester kana pidi sèn. Melfor a kansa di pidi limosna, “Estado sosial ta hopi mal pará for di 10-10-‘10, e ta suspirá. “Si nos no tabatin Yvette, lo m’a stòp masha dia.”
Outor Leoni Leidel-Schenk