Ponementu ofishal di e promé piedra di e kazèrne Foto Extra Boneiru
KRALENDIJK – For di òktober 2010 kuerpo di brantwer di Hulanda Karibense ta kita retrasonan den fase. Prioridat ta formashon di e bomberonan na Boneiru, Saba i Statia. Komandante Jair Tromp ta rekonosé ku e kambionan despues di desmantelashon di e islanan karibense tin influensha riba e personal di brantwer. “Tabata un trayekto difísil. Invershon den personal tabata nesesario, asina nan ta kla pa e reto i pa e eksigenshanan nobo pa brantwer.”
Ku orguyo i aliviá Tromp a revelá djaweps 9 di òktober e plakat na okashon dje ponementu ofishal di e promé piedra den kazèrne nobo di brantwer serka di Flamingo Airport na Boneiru. Brantwer BES tin reim 75 empleado di kua reim 40 ta traha na Boneiru. E alivio ta pasobra Tromp su bomberonan aki un aña lo tin porfin un kazèrne na drechi ku entre otro un lugá bon pa drumi, sufisiente kantor i garashi pa e parke móbil di brantwer.
Belkis Osepa den kombersashon ku Jair Tromp
Retrasonan
Tromp ta traha for di 10-10-’10 na adelanto di e kuerpo. El a enkontrá retrasonan enorme di e tres kuerponan di Boneiru, Saba i Statia. E kuerpo nobo a kuminsá ku insufisiente medionan pa hasi e trabou, asina Tromp ta informá. E parke móbil i alohamentu tabata leu for di optimal. E prioridat prinsipal ta formashon di e bomberonan. “Nos ta papia di mas ku upgrading só. Nos mester soru ku e bomberonan tin e diplomanan korekto aki un par di aña. Nos ta trahando duru riba esaki.”
Brantwer BES ta kai bou di ministerio di Seguridat i Hustisia i konosé un konstrukshon apart. E tres gobièrnunan insular ta responsabel pa ehersé e trabou di brantwer i pa personal. Pero e organisashon riba su mes ta responsabilidat di minister Ivo Opstelten i ta opera segun e lei di seguridat BES. No opstante esaki, e kuerpo di bombero no ta implementá tur regla sin mas. “Nan mester pas na e islanan. No solamente den e kuerpo, pero tambe na kada isla ta tene kuenta ku e esfera i karakterístikanan di e isla”, segun Tromp.
Ayudo
Téknikamente i táktikamente brantwer ta traha meskos ku Hulanda. Un diferensha grandi ta si ku na Hulanda bomberonan por haña ayudo fásil di e munisipionan bisiña. “Aki nos mes mester hasi e trabou i esaki ta konta pa tur tres isla.” Denter di poko Tromp ta konkretisá akuerdonan di koperashon ku kuerponan di bombero na Kòrsou, Aruba i Sint Maarten den kaso di un disaster òf kalamidat.
Tempu benidero lo dediká atenshon na plan di kombatimentu di kalamidat di bombero i tambe komunikashon eksterno kaminda lo dediká ta informashon preventivo.
Outor Belkis Osepa