Sjoerd Slagter, diputado Johnson, i Wim Littooij di Education Task Force – potrèt: Government Information Service

Sjoerd Slagter, diputado Johnson, i Wim Littooij di Education Task Force – potrèt: Government Information Service

THE BOTTOM – Ounke e hendenan na Saba no ta kompletamente satisfecho ku e kambionan despues di 10-10-’10 por ripará ku e komunidat ta traha riba progreso.

Tin keho pero pa mas parti despues di keha ta sigui komentario positivo tòg. “A introdusí tur kos muchu rapido i rigurosamente, pero personalmente ami ta kontentu ku e kambionan”, e sabano Ludwina Charles ta bisa. “Pa trahadó por ehèmpel tin un mihó sistema di kuido. Ta tarda un ratu promé ku tur introdukshon drenta na vigor korektamente.”

Sistema di impuesto i kosto di bida
Diessinku sabano a duna nan opinion tokante e kambionan despues di 10-10-’10 riba e isla chikí ku 2000 habitante. Ta trata di e sistema nobo di belasten, kuido médiko, kosto di bida, enseñansa i gobièrnu di e isla. Mayoria di nan ta satisfecho pa un un gran parti ku a kambia Saba hasié un munisipio ekstraordinario di Hulanda. E asuntunan negativo ta espesialmente e sistema nobo di belasten i kosto di bida.

Un investigashon di e diferensha di preis entre kompra ku a hasi na Hulanda, Boneiru i Saba mas trempan e aña aki tabata asombroso. Na Saba preis di kompra di produktonan esensial pa bida diario tabata dos be mas haltu ku na Hulanda i kasi 40 porshento mas karu ku na Boneiru.

“Tin un oumento dramátiko den kosto di bida sin ku tin adaptashon di nos salarionan. E kambio di florin bai dòler ta un desafio pa mayoria di hende”, Juliette Robinson ta bisa. Durante un bishita na yanüari Gert Jan Segers, miembro di e komishon fiho di Asuntunan Interior i Relashonnan den Reino a bisa ku mester bini un investigashon di e oumento di preisnan den supermerkadonan for di 10-10-’10. “Ta pa motibu di belasten, legislashon òf ta abusu supermerkadonan ta hasi di dòler merikano” ta e pregunta ku Segers a hasi. Te awor no a kaba niun investigashon.

For di Hulanda tin mas atenshon pa problemanan ku a sigui despues di e introdukshon di e sistema di impuesto nobo, despues ku Kamer van Koophandel (KvK) i komersio na Saba a bati alarma. Awor KvK ta traha fondo pa ofresé mas seshon di informashon grátis na kompania na Saba. Den esaki nan ta haña ayudo di KPMG Meijburg Caribbean Belastingadviseurs.

E-Team
Eilandsraad a pidi Saba Business Assosiation (SBA) pa reforsá e E-team (Tim Ekonómiko). Ta e intenshon pa akshonistanan kompartí nan eksperienshanan i bini ku solushon pa stimulá ekonomia riba e isla. Esaki ta ku intenshon pa evitá e sla ora otro aña e prolongamentu di e redukshon di impuesto riba propiedat inmóbil para.

Tin hopi prekupashon tambe pa enseñansa riba e isla. Esaki te awor a haña hopi atenshon di Hulanda. Resientemente a lanta e Educational Task Force (ETF), ku mester trese stabilidat den enseñansa na Saba. ETF ta haña ayudo di dos eksperto di enseñansa di e konseho hulandes VO. E idea ta pa envolví tur stakeholder – mayornan, dosentenan, studiante i hende den komunidat – den e diskushonnan tokante futuro di enseñansa riba e isla.

Sindikato
Ademas ta promé be ku a lanta un sindikato laboral riba e isla: Saba United Peoples Labour Union Association (SUPLUA). Pronto tur amtenar mester ta representá pa e bònt. SUPLUA ke ta un kanal pa mehorá sirkunstanshanan di trabou.

Na Sint Eustatius a kaba di vota pa tene un referèndem nobo tokante státùs estatal mientras ku na Boneiru tin un diskushon grandi tokante referèndem. Te ainda ta manera Saba no ta interesá pa revisá e statùs di munisipio ekstraordinario di Hulanda.

Outor Hazel Durand