E krùithùis bieu na Seru Loraweg a eksplotá na desèmber 2012 - potrèt: Ministerio Públiko

E krùithùis bieu na Seru Loraweg a eksplotá na desèmber 2012 – potrèt: Ministerio Públiko

WILLEMSTAD – “E krùithùis temporario ku gobièrnu a lanta na Brievengat ta pará den un área di konservashon”, presidente di Defensa Ambiental Lloyd Narain ta bisa. E deposito di vürwèrk ta para pegá banda di e área industrial. “Brantwer a indiká ku ta peligroso pa pone krùithùis den un bario hopi populá i serka di un tereno di industria.”

E krùithùis bieu na Seru Loraweg a eksplotá na desèmber 2012. Despues di e eksploshon, kaminda a kai kuater morto i diferente otro hende a keda gravemente heridá, tabatin hopi di hasi tokante e lokashon di e krùithùis ei.

Área di konservashon
Un proposishon pa pone e krùithùis temporario nobo banda di Koraal Specht a resultá den un protesta grandi di e habitantenan di e bario. “Mi ta di shòk kon fasil a pensa pa pone e krùithùis pegá ku un bario di biba. E desinteres ta inkreibel”, asina Narain ta bisa.

Segun e, gobièrnu no a sigui e proseduranan legal tampoko pa pone e krùithùis temporario na Brievengat. “Ora gobièrnu ke konstruí algu den un área di konservashon, mester sigui e prosedura legal einan, kaminda pueblo i otro interesado ta haña e oportunidat pa entregá opheshon. Esaki no a sosodé”, Narain ta bisa.

Sin konsultá
En berdat gobièrnu no a duna oportunidat pa konsultá e pèrmitnan di konstrukshon pa e krùithùis temporario na Brievengat. Segun e Eilandsverordening di Planifikashon Espasial di Kòrsou ta nesesario si pa tin un pèrmit di konstrukshon asina ku tur e proseduranan ofishal envolví.

E pregunta na gobièrnu si a sigui e reglanan, segun Landsverordening di Gobernashon Transparente (LOB), mester hasi na e bentana di pèrmit. Dia 19 di ougùstùs nos redakshon a inisiá e prosedura di LOB pa haña informashon tokante e pèrmit di konstrukshon. Segun lei mester duna e informashon ku a pidi despues di tres siman. Esaki no a sosodé.

Riba 29 di sèptèmber redakshon a risibí un karta firmá pa e hefe di e bentana di pèrmit Shumire Johannes-Ignacio ku e fecha di 9 di sèptèmber, den kua tin pará ku relashoná ku e despacho metikuloso di e petishon di LOB nan ta pidi tres siman di tempu èkstra pa por entregá e dokumentonan. “Nos ta haña nos obligá di suspendé trato di bo petishon. Segun artíkulo 6 di LOB ta konta ku por prolongá e suspenshon aki ku un máksimo di tres (3) siman i ta kaduká riba 30 di sèptèmber 2014”, asina por lesa den e karta, pero te awe redakshon no a haña e pèrmitnan di konstrukshon di e kruithuis mira.

Temporada di vürwèrk
Habitantenan ta prekupá pa instalashon di e krùithùis temporario den e bario di e área industrial di Brievengat. Nan ta rekordá e kandela den e fábrika di betòn mas trempan e aña aki. E intrankilidat ta bira mas i mas grandi segun e temporada di vürwèrk yega mas seka i ku ta ferwagt ku lo warda mas material eksplosivo na e lokashon.

Outor Michelle da Costa Gomez