Hopi pakus pará bashí den Punda – potrèt: José Manuel Dias
WILLEMSTAD – Mientras ku pafó di sentro di siudat ketu bai ta konstruyendo mas sentro komersial, den Punda i Otrobanda tin un kantidat enorme di pakus ku ta pará bashí. Den su mayoria ta trata aki di pakusnan ku a sera nan portanan pa motibu ku no tin sufisiente benta.
Hasiendo un rekorido den e kayanan di Punda nos a konstatá ku tin por lo menos 40 pakus bashí ku sea ta pa hür òf ta na benta. Esaki ta sin drenta tur e hanchinan smal di Punda kaminda tambe tin basta lokal pará bashí.
Un reportahe di José Manuel Dias
Heerenstraat ta e úniko kaya den Punda kaminda no tin pakus bashí. E área kaminda e situashon ta mas bisto ta e área rondó di Pietermaai Parking & Mall, kaminda por mira un kaya kompletamente bashí tur na bòrchi di ‘Te Huur’. Den Pietermaai Parking & Mall mes tambe tin hopi lokal bashí. Hopi negoshi ku a habri den e sentro komersial aki a haña nan obligá di sera nan porta pa motibu ku no tin sufisiente fluho di hende.
Kritiko
Den Otrobanda tambe tin basta pakus ku sea ta pa hür òf ta na benta, pero akinan e situashon ta ménos kritiko ku den Punda. Den kaya grandi di Otrobanda nos a tuma nota ku tin un kantidat di 16 pakus ku ta pará bashí.
Outor José Manuel Dias