Foto: Ariën Rasmijn
ORANJESTAD — Tur cos ta mustra cu e conflicto entre Stichting Arubaanse Carnaval (SAC) y 17 grupo hunto cu minister di Cultura Otmar Oduber pa loke ta organisacion di futuro edicionnan di carnaval ta bay termina den corte.
Scucha conferencianan di prensa di SAC y gruponan di carnaval
SAC ta keda para riba su posicion cu gobierno mester otorga e unico permiso anual pa organisa carnaval na dje manera tabata e caso den ultimo 60 aña. Gruponan Uni, cu apoyo di minister Oduber no kier traha cu SAC mas y kier forma parti di un fundacion nobo, SMAC, cu lo bay organisa e eventonan di e temporada for di awo en adelante.
‘Conflicto di interes’
Ambos SAC y e 17 Gruponan Uni a tene conferencia di prensa ayeratardi, mientras cu minister Oduber tambe a duna su declaracion na radio. Gruponan di carnaval ta haya cu SAC no ta scucha nan y no ta inova. Durante nan conferencia di prensa nan a mustra entre otro riba con tiki a wordo haci pa trece hende di afo y haci promocion pa Carnaval 60 e aña aki.
Di otro banda SAC ta keda para riba hecho cu nan a organisa e eventonan di e temporada aki consistentemente pa 6 decada largo y cu no tin motibo valido pa nan no por sigui haci esaki. Ambos Tecla Kelly y Darin Crouch, abogado di SAC, ta di opnion cu minister Oduber, por cierto lider di e grupo mas grandi te cu edicion di aña aki, no a hunga su rol di mediador neutral debidamente.
‘SAC no a muri’
Den su reaccion na radio minister Oduber ta bisa cu SAC no kier a bay di acuerdo cu su proposicion pa bin cu un organo cu lo intermedia den disputanan entre nan cu gruponan. Tambe ela a acusa SAC di no a mustra un actitud cooperativo. P’e ta cla caba cu e lo bay recomenda na prome minister pa no duna SAC permiso pa organisa Carnaval 61. Ya caba anteriormente SAC a duna di conoce cu lo bay lanta caso sumario si no otorga permiso. Gruponan Uni a duna di conoce cu si SAC gana caso sumario y forsa haya permiso via hues, nan lo no participa.
Minister Oduber a keda mustra riba hecho cu SAC tin un menoria di sosten pa nan organisa carnaval y cu ‘casi 100 porciento’ di e gruponan no kier traha cu nan mas. A puntra Tecla Kelly si lo bay aplica pa permiso atrobe otro aña si perde e caso. Su respuesta: “Si. Pasobra SAC no a muri.”
Autor: Ariën Rasmijn