Sekretario di estado Sander Dekker – potrèt: Suzanne Koelega

Sekretario di estado Sander Dekker – potrèt: Suzanne Koelega

DEN HAAG – Enseñansa na skolnan di enseñansa sekundario na Hulanda Karibebse mester drecha rápidamente. Ainda mester alkansá e nivel básiko ku a palabrá, direktivanan di skol mester traha nan trabou mas mihó i mester solushoná e skarsedat na maestro.

Si e situashon di e skolnan no mehorá i no sigui konsehonan di Hulanda komo kastigu e skolnan lo haña ménos plaka. Esei sekretario di estado Sander Dekker i Tweede Kamer ta konkluí awe den un debate. “Mi no ta hui pa sankshon pero laga nos spera ku esakinan no ta nesesario pasobra ta e alumnonan lo ta e proménan ku ta bai ta víktima”, segun Dekker.

Espesialmente skolnan sekundario tin problema ku e mehorashonnan den enseñansa for di tempu ku Boneiru, Saba i Sint Eustatius a bira munisipio di Hulanda. E tempu ei a palabrá ku pa mas tarda na 2016 e enseñansa mester ta na e nivel básiko ku ta na vigor na Hulanda tambe. Pero entretantu tin un skarsedat grandi di dosente, direktivanan di skol i dosentenan ta pleita i esaki ta pone ku mayornan i alumnonan ta malkontentu.

Plaka
Pa por drecha e kalidat di e skolnan rápidamente i sigui e konsehonan di Hulanda, Dekker a pone plaka èkstra disponibel te 2018: Un total di 12.7 mion pa e tres islanan huntu. E plaka aki ta bini pasobra for di investigashon a sali ku e bùdjèt aktual no tabata yega p’esaki.
Banda di esaki e skolnan na Saba i Statia ta haña mas plaka èkstra. Nan a entregá un plan pa trata problema. E plaka aki ta bai entre otro pa edukashon èkstra di dosente, coaching pa direktivanan di skol i pa alkansá retraso. For di Boneiru ainda no a bini niun plan, ke men no ta bin plaka èkstra tampoko. “Na Boneiru no ta tur ora nan ta gradisidu pa e sosten ku ofresé”, segun Dekker. Nan ke ku nan sa mihó. Pero inspekshon lo ta riba dje pa intervení si ta nesesario.”

Idioma
E konosementu limitá di idioma hulandes di e alumnonan ta un punto di prekupashon konstante seka e parlamentarionan i e sekretario di estado. Awor ku na Statia ta bai introdusí ingles komo idioma di instrukshon i ku lo bai kambia pa e sistema di CXC (Caribbean Examination Council), André Bosman di VVD ke sa ta kiko esaki lo nifiká pa balor di un diploma. Dekker ta indiká ku ta Nuffic ta balotá e balor di e diplomanan CXC, pa asina por kompará nan ku e diplomanan hulandes. Pa Boneiru ta konta ku un diploma di havo òf vwo sí mester tin e mésun nivel ku e diploma ei na Hulanda.

Alumno ku mester di mas atenshon
Alumnonan ku mester di atenshon i kuido èkstra na Hulanda Karibense ta sinta den klas regular. Esaki ta pidi un ekspertisa èkstra di e dosentenan, asina e miembro di D66 Paul van Meenen ta haña. E ta spera ku lo bini mas atenshon pa e alumnonan aki. Dekker ta kontestá ku pa esakinan tambe tin plaka èkstra disponibel, pa asina train e dosentenan adishonalmente pa trata ku esaki. E eskala chikí di e enseñansa riba e islanan ta pone ku ta masha difísil pa ofresé enseñansa spesial.

Enseñansa básiko
Esnan envolví den enseñansa básiko a risibí un kòmplimènt durante e debate. E – i e parlamentarionan tambe – ta konstatá ku ei ta traha masha duru na progreso. “Esei ta importante, pasobra bon enseñana riba término largu lo yuda hiba ekonomia, kuido i henter komunidat bai dilanti. E kos ta kuminsá serka e generashon nobo ku ta haña e oportunidat pa hiba e islanan dilanti”, segun Dekker.

Outor: Jamila Baaziz