Hopi palu putrí riba brùg Emma – pòtrèt José Manuel Dias
WILLEMSTAD – Mal kalkulashon den diseño i aplikashon di materialnan durante e ultimo renobashon ta pone ku mester bolbe bai renobá henter e superfisie di brùg Reina Emma, miho konosí komo brùg di ponton. E dèk di palu ku tin aktualmente ta den hopi mal estado i tur kaminda por mira palunan putrí ku ta forma un peliger pa peatonnan.
Ta hopi ta e peatonnan ku sea a yega di trompeká debí na palunan ku a lanta òf a yega di kai pa motibu di e burakunan ku tin riba e superfisie di brùg. Curaçao Ports Authority (CPA) ku ta e instansha ku tin maneho di brùg Emma bou di su enkargo a trata di remediá e situashon pero sin e resultado deseá ya ku e palunan ku tin bou di e dèk tambe ta putrí.
Un reportahe di José Manuel Dias
Despues di a deliberá ku Nederlandse Organisatie voor toegepast- Natuurwetenschappelijk Onderzoek (TNO) i Servisio di Obranan Públiko (DOW) a yega ne konklushon ku e estado ta hopi deplorabel i ku mester renobá e superfisie kompletu. E renobashon lo dura mas o ménos dos luna i lo keda ehekutá meimei di otro aña despues di e temporada haltu di barku krusero.
Outor José Manuel Dias