Ta kalkulá preis di bèrdura i fruta ku un margen di preis máksimo
WILLEMSTAD – “Nos ta bende tiki produkto di makutu básiko intenshonalmente, sino nos no por paga nan”, Joel Gois Da Silva, doño di dos sukursal di Goisco, ta bisa. Segun Gois gobièrnu mester a eliminá e makutu básiko masha dia kaba pa asina krea un merkado liber.
E makutu básiko ta konsistí di nesesidatnan primario manera lechi, bèrdura, fruta i mansa. Te 2011 supermerkadonan mester a tene nan mes na un preis máksimo pa e produktonan aki, pero for di 2011 pa bèrdura i fruta tin un margen di preis.
“E margen di preis pa e produktonan aki mayoria be ta entre 8 pa 10 porshento”, Alain Evertz, general manager na Vreugdenhil Supermarkt ta konta. Esaki no ta realístiko pa bendedónan. Bo no por kubri tur gastu asina. Un margen realístiko ta yega entre 20 pa 30 porshento fásil.
Derecho di duana
Evertz ta splika ku no por kompará benta di produkto na Kòrsou ku otro kaminda na mundu. “Espesialmente gastunan di koriente ta masha haltu. Pone aseka gastu di empleado, hür i naturalmente derecho di duana. E último aki for di 2011 a bira mihó si pa hopi produkto. Nos no tin nodi di paga esaki mas pa bèrdura, pero riba otro produkto tin be tin mei 27 porshento di derecho di duana. Pa por sobrevivi nos mester kobra gastu. Un supermerkado no por keda sin bende produkto di makutu básiko, ma esaki ta bai a kosto di otro produkto.
Enrique Ribeiro di Centrum Supermarket ta bisa ku ta subi preis di otro produkto pa asina por ofresé e produktonan di makutu básiko. “Nos ta hasi nos bèst. Mi ta trata na traha otro dil òf bestèl mésora serka un provedor, pero e kos ta keda difísil. E Makutu Básiko no ta bon pa nos.”
Pilot
Na 2011 representantenan di e importadónan i supermerkadonan a sinta na mesa ku gobièrnu i Fundashon pa Konsumidó pa buska un solushon adekuá pa e produktonan di makutu básiko. A establesé e margennan di ganashi i e komposishon di e makutu di nobo. Pronto lo bini adaptashon atrobe. Preis máksimo fiho lo disparsé i tur preis di e makutu básiko lo kalkulá a base di un margen di ganashi fiho. “E bendedónan tambe por a duna nan opinion ora di establesé e margennan di ganashi i nan a bai di akuerdo ku esaki”, Marshall ta sigui. “For di gobièrnu awor tin un pilot ta kore pa outomatisá e proseso di ponementu di preis. A base di dunamentu di e preisnan di importashon obligatoriamente pa kada bendedó ta pone un preis máksimo pa produkto. Gobièrnu ta registrá e frekuensha ku kua ta importa produkto i adaptá preis. Kòntrol lo tuma lugá despues den pakus.”
Skèn produkto
Pasobra Fundashon pa Konsumidó ke duna e konsumidó mas informashon e fundashon na kuminsamentu di 2015 lo saka un aplikashon ku kua por skèn preis di produkto ku un smartphone. “E aplikashon mésora ta mustra e último preis konosí di e produkto i e konsumido por hasi un komparashon den real time di e preisnan den e diferente pakusnan. Na final ta e intenshon ku e konsumidónan mes lo usa e aplikashon pa inkorporá e preisnan i asina yena e sistema ku preis aktual. E resultado ta un merkado mas transparente.”Supermerkadonan e ora ei mester hasi nan esfuerso mas mihó ainda pa ofresé un produkto mas barata ainda di mihó kalidat, pasobra por lo pronto un merkado liber lo no ta e kaso.
Outor: Elisa Koek