Departamentu di Kuido Intensivo di hòspital St. Elisabeth – José Manuel Dias
WILLEMSTAD – “Mi no ta kere ku nos ta ègt prepará, pasobra te ainda nos no a wòrdu poné na altura kon pa dil ku e malesa di Ebola”. Asina un di e enfermeranan di hòspital Sint Elisabeth (SEHOS) a reakshoná riba nos pregunta ku si hòspital ta prepará pa atendé ku Ebola.
E enfermeranan ku nos a aserká a informá nos ku tantu e trahadónan den e departamentu general di hende muhé, komo esnan den e departamentu kirúrgiko di hende hòmber, te ainda no a risibí ningun klase di informashon tokante Ebola.
Protokòl
E departamentu di kuido intensivio, konsiderá komo un di esnan prinsipal den tratamentu di posibel kasonan di Ebola, tampoko no ta disponé di e informashon nesesario. Segun presidente di e sindikato CBV, Coromoto Maria, aki tambe a keda sin informá e personal konserni tokante e protokòl eksistente pa atendé ku e malesa di Ebola.