Luigi Eybrecht - foto: Stinapa Bonaire

Luigi Eybrecht – foto: Stinapa Bonaire

KRALENDIJK – Ya kaba ku su bintiun aña e ta un inspirador i determiná pa sigui promové naturalesa di Boneiru. E Boneriano Luigi Eybrecht lo biaha komienso di novèmber pa Sydney na Oustralia pa risibí e premio dr. Jane Goodall ‘Hope and Inspiration Ranger’ Award.

A skohé Luigi Eybrecht for di e tantísimo nominashonnan pa e premio Jane Goodall. E mes ta haña un honor no solamente p’e só, pero pa henter Boneiru. “Ta un premio internashonal grandi. E organisashon mundial a wak ami komo un hende ku ta konservá naturalesa di su isla i promové Boneiru komo destinashon. E premio ta demostrá ku tin un lugá chikí manera Boneiru ku ta hasi hopi pa konservá su naturalesa.”

Belkis Osepa den kombersashon ku Luigi Eybrecht

Interes
For di sèptèmber Luigi Eibrecht ta un ‘marine park ranger’pa Stinapa Boneiru. No ta aworaki komo wardadó di parke e tin amor pa naturalesa, pero for di chikí e tabatin e interes pa duna tur ku tin pa naturalesa. Banda di su skol e tabata hopi aktivo i a traha sinku aña pa e proyekto Junior Ranger di Stinapa.

Dia 15 di novèmber Eybrecht lo para dilanti di mas ku kuater mil delegashon mundial di naturalesa i partisipá na e kongreso World Park na Sydney. Lo e duna un presentashon di su trabou i e konservashon di naturalesa na Boneiru. Den futuro Eybrecht ke duna lès na hóbennan, inspirá i konsientisá nan di e naturalesa bunita rònt di nan. “Mi ke kambia hende su pensamentu tokante naturalesa i mustra riba e importansha di naturalesa di Boneiru.”

Outor Belkis Osepa