Chikungunya tin un periodo di inkubashon di dos te diesdos dia
WILLEMSTAD – E kos a kuminsá dia 23 di yüli. Mi tabata sinti gana di saka. Manisé meinta mi tabata traha na mi computer. Banda di mèrdia m’a sinti un dolo di kabes. M’a disidí di drumi riba kama un ratu, un ora asina. Djei di bèrdè mes un kos a kuminsá.
Mi tabata konvensé ku mi tabatin dengue pasobra mi tabatin doló di skarnir i keintura haltu. Mi no a pensa mesora riba chikungunya. E vírùs a lanta kaba riba e isla pero pa mayoria e tabata deskonosí. Pa mi tambe.
Skarnir
Un doló di kabes tabata bati tras di mi wowonan i tabata pone mi kòrda migrèn. Ademas tur mi skarnirnan tabata morde i mi tabatin un keintura ku den algun ora a subi pasa 39 grado Celsius. Kasi mi no por a kana mas. E skarnirnan di mi ènkel i kupi di pia a ‘pega’. Pa kana bai baño – un distansha di sinku meter so – tabata tuma mas ku sinku minüt.
E skarnirnan di mi rudianan, hepnan, pòlsnan i dedenan tambe tabata morde. Esaki a dura tres dia. Solamente uso di paracetamol, konseho di dòkter, a yuda baha e doló un tiki. Riba e di kuater tabata parse manera un alivio a kuminsá. E keintura a baha bira djis un tiki kayent’i kurpa. E dolónan di skarnir tabata parse ménos i e doló di kabes tambe a disparse kasi tur tur.
E di sinku dia mi kueru a rebultá. Di kabes te pia mi kurpa tabata kubrí ku bòlòbònchi kòrá ku tabata grawatá. E kroukrou a dura dos dia, despues mi kueru a keda sensitivo i ku doló, espesialmente den lus di solo.
Ora ku e rebultashon a pasa e doló di skarnir a bini bèk masha fuerte mes. Ounke mi tabata sosegá bon, mi tabata sinti mi morchá. E ora ei mi kasá i mi yu muhé di kuater aña a haña e malesa.
Mi yu muhé a haña e síntomanan un siman despues ku nan a kuminsá seka mi, i seka mi kasá un par di dia mas despues atrobe. Seka nan tur dos e sekuensha di síntoma tabata eksaktamente meskos. Ku nos yu muhé nos a bai dòkter, pasobra e keintura tabata pasa 40 grado. E dòkter di warda mesora a yena un formulario pa kue sanger na laboratorio. Ami mes a bai kue sanger dos be. E promé be, un siman despues ku e malesa a kuminsá, no por a saka un diagnosis for di e sanger.
Antikurpa
E dòkter a bisa ku por a determiná e malesa numa te ora ku e síntomanan bai i ku por haña antikurpa den e sanger. Na e di dos tèst seka mi si a konstatá chikungunya ofishalmente. Aworaki nos tin eksaktamente tres luna despues: e doló di skarnir te dia djawe no a kita tur tur. Un dia ta bai mihó ku un otro, ma ora ora ainda mi ta lanta ku ènkel steif.
Si mi mester traha na mi computer algun dia tras di otro, kasi mi no por move mi dedenan mas. Tur siman e molèster ta bira ménos si. Segun dòkter por dura te un aña promé ku e dolonan den skarnir kita tur tur i espesialmente seka hende mayor di edat esaki por keda pa sobrá di nan bida.
Aktualmente nos yu muhé kasi no ta sinti doló di skarnir mas, ma mi kasa si ta keha ainda. Pa e para hopi òf kana distansha largu ainda ta doloroso. Awor ku mi sa ku e tempu di inkubashon ta entre dos i diesdos dia, mi ta kere ku ta un sangura tiger a piká mi den besindario di klínika di maternidat na Rio Canario i ku ta ei mi a pega ku e enfermedat.
Prevenshon
Rondó di kas nos a kita tur kos ku awa por keda para aden kaminda sangura por pone nan webunan. Tur hende lo mester hasi esaki pasobra al fin i al kabo ta prevenshon ta e úniko ku ta yuda.
Outor: Michelle da Costa Gomez