Wendel Sluis ‘Yuana Man’, 28 aña trahando ku yuana – pòtrèt: Jose Manuel Dias
WILLEMSTAD – E luna aki ta hasi eksaktamente 28 aña ku Wendel Sluis mihó konosí komo ‘Yuana Man’ ta eksibí su yuananan ku turistanan den kayanan di Punda. Hopi hende ta mira ‘Yuana Man’ komo un atrakshon túristiko pero tin tambe ku ta kuestioné riba posibel maltrato di e bestianan aki.
Wendel Sluis ta nenga ku e lo ta droga e yuananan pa por hasi nan mansu. “Ta un don ku mi tin pa hasi e yuananan mansu i ta kuestion di laga esakinan kustumbrá ku hende i nada mas”.
Un reportahe di José Manuel Dias
Segun Sluis ta tumele entre seis siman pa tres luna di tempu pa por hasi un yuana mansu. “E bestianan aki ta wòrdu kría ku patia i papaya den kurá di mi kas na Bandabou i nan no ta kore bai fásilmente”.
Fuente di entrada
Aktualmente Sluis tin un total di seis yuana for di kual e ta skohe tres pa eksibí ku turistanan. E ta traha un siman largu ku e mesun yuananan i despues ta kambia nan pa e otro tresnan. Ekshibishon di yuana ta su úniko fuente di entrada. Pa kada turista ku saka pòtrèt ku su yuananan Wendel Sluis ta kobra 5 dòler.
Outor José Manuel Dias