Stasianonan dia 17 di desèmber por vota pa e futuro konstitushonal di nan isla – potrèt: The Daily Herald
ORANJESTAD – Stasianonan dia 17 di desèmber den un referèndem por ekspresá nan mes tokante futuro estatal di nan isla, asina eilandsraad a disidí. Esnan ku derecho di vota ta haña kuater opshon: independensha, outonomia den reino, integrashon den Hulanda i mantenshon di e státùs aktual di kuerpo públiko.
E resultado di e referèndem no ta obligatorio. E referèndem tin solamente un státùs di rekomendashon i e resultado ta balido solamente si por lo ménos 75 porshento di tur esnan ku tin derecho di vota bin vota tambe.
Eilandsraad dia 8 di òktober kaba a ekspresá ku e ke pa tene un referèndem. E komishon di referèndem a proponé pa ten’é te 14 di yanüari numa. E ora ei lo tabatin mas tempu pa prepará, mientras ku lo a keda sufisiente tempu entre e referèndem i elekshonnan di eilandsraad riba 18 di mart. Pero eilandsraad ku un mayoria grandi a vota pa 17 di desèmber.
Konsehero eksterno
Ta Democratische Partij (DP) so a vota kontra. Na final e eskoho di e opshonnan di e referèndem a bini kla sin kontribushon di konsehero eksterno. Eilandsraad pa diferente motibu a bai di akuerdo solamente ku nombramentu di wes Wit. Pasobra no tin sufisiente tempu pa aserká otro eksperto konstitushonal, e komishon di referèndem a disidí di traha un diseño nan mes.
Dia 8 di aprel 2005 tambe stasianonan por a ekspresá nan mes den un referèndem tokante futuro di nan isla. Ku 56 porshento e kantidat di hende ku a bin vota no tabata hopi. Mantenshon di Antia Hulandes ku 76.5 porshento tabata e opshon mas popular. Laso direkto ku Hulanda a haña 20.6 porshento. E opshonnan ménos popular e tempu ei tabata integrashon den Hulanda (2.1 porshento) i independensha (0.6 porshento).
Outor: John van Kerkhof