Apertura ofishal – foto: Extra Boneiru
KRALENDIJK – Nederville Pietersz a usa droga i ta konosí serka hustisia. E bida di Pietersz ta mehorando poko poko.E ta partisipá den e proyekto di trénen di bibienda i ta anhelá pa haña un trabou. “Mi ta aseptá den komunidat, pero no riba merkado laboral.”
Nederville Pietersz ta biba huntu ku diesshete otro hende hòmber den dos kas di akohida di e Fundashon pa Kuido di Adikshon i Sikiatria (SVP-CN). Siman pasá a habri ofishalmente e portanan di e di dos kas ‘Kunuku pa Perseveransia’. E habitantenan ta firma un kontrakto di tres aña. Nan ta haña guia i ayudo pa nan adikshon i tambe pa nan problemanan soshal i sikiátriko. E partisipantenan ta liber pa bai unda ku nan ke, ku e meta pa duna nan un chèns pa bolbe bèk den e komunidat boneriano.
Kamber pa un partisipante foto: Belkis Osepa
Relashon
Kada kas tin nuebe kamber i lokalidatnan komun pa e partisipantenan. Pietersz ta satisfecho ku e guia pa despues e bai biba independiente. Tambe e relashon entre su kasá I yunan ta bai den bon direkshon. “E proyekto ta siñami sosialisá. Mi ta wak e mehorashon den mi bida.” Un kos Pietersz ke masha tantu: un trabou. “Mi mester di un entrada pa biba.”
Segun guiadó di e bibiendanan Siani Cijntje di SVP-CN adiktonan ta haña hopi bia un stèmpel. “Nan tabata èks-adikto i tabatin nan problemanan soshal. Pero nan mester bai dilanti tambe. I úniko manera pa e bai dilanti ta ku yudansa di komunidat. Pues trabou tambe mester traha riba dje.” E búskeda pa trabou ta tambe un parti di kuido di SVP-CN. E partisipantenan ta haña for di yanüari ayudo profeshonal pa yuda nan di un manera struktural pa haña trabou.
Outor Belkis Osepa