ALKMAAR/WILLEMSTAD – E muchanan di Kolegio Dòdò Palm na Kòrsou tin hopi nesedat di banki di skol nobo. Esnan ku nan tin ta gastá i kibrá. Pero tin un problema grandi: niun hende no ke paga pa barka e mobilario di skol ku a kolektá pa nan na Hulanda.
“Pa e muchanan e bankinan ta masha nesesario”direktor di skol Saiseline Senior ta bisa. Bon mobilario ta importante pa un bon postura di sinta.”E bankinan ku e muchanan di su skol ta sinta ‘riba ta visibelmente gastá. Pesei kuminsamentu di e aña aki el a pidi yudansa di Ruth Groenewoud di Fundashon Miss IQ na Alkmaar. Na Noord-Holland e ta kolektá mobilario pa skol, ko’i hunga i buki pa pa mucha.
Depósito
Asina ta ku den un depósito riba un tereno industrial na Alkmaar for di april tin un gran kantidat di hopi diferente tipo di artíkulo pa skol ta warda un bida nobo. Tur huntu esaki ta mas o ménos un kònteiner yen: kaha ku skref nobo nobo, buki, stul i mas ku shen banki di skol. Donashon di skolnan den besindario. Pero e plaka ku mester pa transportá nan pa Kòrsou – mas o ménos 800 euro – no t’ei.
Deseo
Rondoná di tur e artíkulonan Groenewoud ta konta ku el a keda sin drumi anochi: “Ta mi deseo pa e kosnan yega Kòrsou promé ku Pasku, ma komo fundashon chikí nos no por paga. No ta piká si e kosnan aki no por bai? Nan mester bai, kla.”
Banki di skol na Kolegio Dòdò Palm – potrèt: Elisa Koek
“Akinan ta masha difísil pa laga e kosnan yega”, Senior na Seru Fortuna ta bisa. “Nos no por pidi e mayornan di e muchanan di Seru Fortuna aki plaka. Nan ta pasa trabou kaba pa sali ku nan sèn tur luna, ke men ta unda nan ta bai saka e plaka aki. Nan no tin e. Mi ta spera ku nos lo logra sino atrobe nos mester bai pidi limosna i buska spònser.”
Desesperá
Na Hulanda entretantu Groenewoud ta desesperá: “Nos a purba tur kos kaba. Petishon riba Facebook, skibi organisashonnan, yama na telefon, pidi gobièrnu di Kòrsou i komunidat antiano na Hulanda pa yuda… Si tur hende duna algu nos lo logra, asina m’a pensa. Pero no tabatin resultado. Mi ta desapuntá. Di bèrdat m’a fèrwagt ku hende lo tabata kontentu ku e tipo di esfuerso aki pa e muchanan pober di Kòrsou. Esaki ta masha doloroso.”
Groenewoud i Senior ta spera un milager chikí, pa asina e kosnan por bai Kòrsou lihé ainda. Senior a tuma kontakto ku duana di Kòrsou pa haña sa kiko eksaktamente ta nesesario pa importá e kosnan. E ta keda spera un solushon. “E muchanan meresé e kosnan aki. Nan tabata masha kontentu tambe ku e kosnan ku aña pasá sí a yega Kòrsou via Miss IQ.”
Smak a kita
Groenewoud tambe ta keda kombativo, pero e eksperiensha aki a kita su smak si pa hasi un esfuerso boluntariamente pa e muchanan di e isla kaminda el a nase. E no sa si e ta bai sigui: “Mi ke ku mi ta bai stòp di kolektá kos pa Kòrsou. Mi ta preferá manda e kosnan pais ku ta mas gradesido. Pais kaminda gobièrnu ta para habri pa risibí e tipo di material aki for di Hulanda. Ta doloroso, pero si nos no logra e kosnan ta bai Maroko.”
Outornan: Elisa Koek i Jamila Baaziz