Presidente di SAC Tecla Kelly na palabra. Na su banda robes abogado Darin Crouch – foto: Ariën Rasmijn
ORANJESTAD — Stichting Arubaanse Carnaval (SAC) ta bay entama un caso sumario contra gobierno di Aruba. Abogado Darin Crouch ademas ta considerando pa lanta un caso civil contra e fundacion di carnaval nobo SMAC.
Scucha e entrevista di Ariën Rasmijn cu abogado Darin Crouch
Motibo
E caso sumario contra gobierno ta pa e decision cu prome minister Mike Eman a tuma pa duna SMAC e permiso pa organisa carnaval. “Nos ta bay pidi gobierno pa duna nos un bon motibo pakico SAC no por haya e permiso mirando con el a wordo haci tur e ultimo 60 añanan cu a pasa”, segun Crouch. Su bufete ta haciendo research aworaki pa loke ta e di dos caso cu nan kier entama, un caso civil contra e fundacion nobo SMAC mes cu e meta pa laga hues declara e fundacion nulo.
“Na mi opinion a lanta e fundacion aki cu e solo proposito pa stroba SAC den haci su trabou di organisa carnaval. Anto si mi lesa den ley esaki lo ta empugna cu orden publico”, segun Crouch. “Nos ta bezig ta evalua esaki, pero mi ta kere pa 95 porciento cu nos ta entrege na Corte. “No por warda hopi tempo. SAC a haya permiso pa organisa un evento di apertura di carnaval riba 11 di november.
Permiso
Segun presidente di SAC Tecla Kelly y abogado Crouch esaki basicamente ta duna SAC derecho pa organisa tur otro evento di e temporada. Es mas, Crouch ta duna di conoce cu tur permiso pa e eventonan pa cual SAC a haci peticion ya tabatin nan firma caba di polis. Sinembargo hefe di polis lo a haya orden for di gobierno pa no otorga e permisonan aki.
Autor: Ariën Rasmijn