Anton Hermans
THE BOTTOM – “Saba Comprehensive School mester bira esun di mihó den Hulanda Karibense”, e kabes nobo di e úniko skol di enseñansa sekundario na Saba, Anton Hermans, ta bisa. Aktualmente e skol básiko na Statia ku e nòmber The Golden Rock tin e título aki.
Hermans tin basta kos di hasi ainda. E skol ya pa añanan largu tin problema ku e kantidat abou di maestro i problema ku direktiva di skol. Na 2016 tur skol na islanan BES mester kumpli ku e kalidat básiko di Hulanda. Banda di esaki no ta tur hende na Saba ta sostené Hermans.
Retiro
Na aprel e skol a retirá kuater dosente i e direktor i a hañ’é pegá ora dos otro dosente solidariamente a tuma nan retiro. Ta te na yüni e skol a buska remplaso. Banda di esaki tres miembro di direktiva a laga kai. Hopi mayor i èks dosente ta solidario ku e kabes di skol bieu i a ekspresá esaki den social media.
“Mi ta siniti mi ataká”, Hermans ta bisa. “Mi ta respetá libertat di ekspreshon di opinion pero e manera di komuniká aki no ta bon pa e skol, e dosentenan i na final e studiantenan. Si e hendenan aki berdaderamente tin enseñansa na pechu, nan mester stòp di reklamá riba social media i bini ku idea pa mehora enseñansa.”
Dia dies di òktober e skol a haña bishita di Inspekshon di Enseñansa Hulandes. “Nan a bai mas positivo ku nan a bini”, Hermans ta bisa. “Esaki ta duna mi speransa ku nan ta aprobá nos enfoke. Inspekshon a puntra si nos ta kla ku e mehorashonnan pa 2016. Mi kontesta ta: pakiko nò? Sino 2016 di mes ta bira 2017 i kaba 2018.” Pa logra su meta e ta traha duru pa mehorá e kuríkulo pa kada materia. E dosentenan aktualmente ta traha na e programa di sondeo. Lo renobá e klasnan di e skol for di desèmber.
Kontinuidat
E skol tin añan ta lucha ku kontinuidat di e dosentenan. “Nos ta saka mas plaka pa eduká nos dosentenan mas mihó. Pero djei nan ta bandoná e skol, pasobra ku mas konosementu tin mas posibilidat otro kaminda. Di otro banda tin dosente ku sí ta keda riba e isla pero ku ta nenga di sigui studia. “OCW a pone seis mion dòler disponibel pa atraé i espesialmente mantené dosente na islanan BES. Sekretariodi estado Sander Dekker a menasá kaba di kòrta den fondonan si promé ku 2016 yega enseñansa no mehorá.
Hermans ke invertí den iPad pa e studiantenan. Ma e ora ei internet mester traha bon si. Na e departamento di IT di e skol hopi be computer ta kai afó i ta dura largu pa haña computer nobo. Segun e kabes di skol esaki ta un prekupashon den drechamentu di e enseñansa promé ku 2016.
Feria di karera
E kantidat di mucha ku a kita skol prome ku nan a kaba na Hulanda ta haltu pa motibu di e barera di idioma i falta di guia i informashon. For di e aña di skol aki e studiantenan ta haña mas maneho den skohementu di un edukasho adishonal den un otro pais. E siman aki e studiantenan ta partisipá na e promé feria di karera na e skol. E idea ta pa mustra e studiantenan ku Hulanda no ta e úniko opshon.
E aña di skol a kuminsá malu pasobra tur dosente no tabata presente na e isla pa motibu di prosedura di imigrashon. Aktualmente ta e dosente di ‘Business’so falta; e ta yega e isla e siman aki numa.
Outor: Hazel Durand