Muchanan hañando lès di músika klásiko serka maestro Donny Moron – pòtrèt: Jose Manuel Dias
WILLEMSTAD – “Mi ta meimei di laman aki, no tin motor pa pusha e barku, anto mi mester huza e remanan ku tin. Anto ta esei mi ta hasiendo aworaki”. Asina Donny Moron ta deskribí e situashon aktual di Fundashon Orkesta Sinfónika Hubenil Kòrsou, despues di a bolbe tuma mando di e skol di músika klásiko.
Un reportahe di José Manuel Dias
Apesar di e difikultatnan finansiero ku e skol ta pasando aden, Moron ta hopi positivo ku sèn lo drenta for di algun skina pa asina e por sigui siña e muchanan músika klásiko. “Despues ku e direktiva anterior no kier a sigui mas ku e skol di músika, mi mester a kuminsá práktikamente di nobo. E skol yama awor: Spiccato, School of Music and Arts”. E lèsnan ta wòrdu duná despues di ora di skol kaminda antes tabata Barika Hel Kleuterschool na Mundo Nobo.
Donny Moron ta spera di por tin mas mucha interesá den siña toka instrumentonan klásiko. Esaki no solamente ta yuda desaroyá nan talento musikal pero tambe ta yuda kita e muchanan for di riba kaya. Banda di siña toka instrumento ta e intenshon pa den futuro serkano introdusi lèsnan di kanto i tambe lèsnan di pintamentu.
Outor José Manuel Dias