Frontpage di Diario awe. Foto: Ariën Rasmijn
ORANJESTAD — Kenneth Wever, esposo di lider di MEP Evely Wever-Croes a gana su caso sumario contra Diario. E matutino a haci un rectificacion den su edicion di awe y tin cu paga Wever 5000 florin.
Hues den su sentencia a para keto na e principionan di libertad di expresion y libertad di prensa. Un prensa liber y preferiblemente tambe independiente di interesnan politico y comercial ta importante pa estado di derecho. Pa por fungi como tal ta permiti prensa pa bay basta lau tambe, aunke e interes ey no necesariamente ta pisa mas cu e derecho di un persona of entidad di no wordo acusa di delitonan y wordo atacha na nan bon nomber y integridad sin cu tin base pa esaki.
Hues den su sentencia cu ta conta no menos cu 22 pagina ta haya cu Diario no por a presenta pruebanan contundente pa loke e corant ier a trece padilanti. Ademas e corant a parce di no tabata por dicidi ariba kico exactamente Wever, su casa y su suegro Hendrik Croes tabata haciendo robes. na un momernto tabata acusa Wever-Croes di no declara entradanan na presidente di Staten. Den otro pasahenan Diario tabata mustra riba e cuestion di huurmento di edificionan di famia Croes na gobierno. Tambe tabata referi na supuesto labamento di placa, viahenan na Virgin Islands y maneranan pa no declara sumanan na MOT. Tur e temanan aki tabata wordo combina hunto den e articulonan.
Virgin Islands
Segun hues, unico hecho concreto cu Diario por a prueba ta cu Wever a saca 30.000 florin for di cuenta di compania di su suegro, Eris Crius VBA. Cu Wever lo a bay cu e placa ey hinca den un maleta pa Virgin Islands via St.Maarten no a wordo proba. Esey segun hues a keda na un redo cu e corant no por a substancia, apesar cu repetidamente a anuncia cu lo bin cu mas pueba. Unico cu a keda para segun hues tabata e screenshotnan di banco cu riba dje tabata manipula. E suma mes ta cuantioso – mas cu e suma di 25.000 cual ta e minimo na unda mester declara suma. Pero segun hues esaki ta trata di un transaccion for di un banco Arubiano cual ta hacie improbabel te ora prueba otro cu ta trata aki di labamento di placa. Segun ley mester asumi cu e banco ta controla riba esaki.
Tabatin mas transaccion cu a tuma luga aki na Aruba, di banco pa banco. Sin prueba concreto di lo contrario mester keda asumi cu e banconan concerni a controla e sumanan riba nan procedencia, segun Hues. Diario no por a prueba tampoco cu Kenneth Wever lo a laba placa criminal, of cu Eris Crius a wordo lanta cu e solo proposito di tapa actonan ilicito. Diario ademas tampoco a aserca Wever cu un oportunidad pa reacciona riba acusacionnan.
Wever mester a cumpra espacio den corant pa publica un remitido anto riba mesun pagina Diario a reta su persona pa bay Ministerio Publico contra nan. Wever su vordering pa forsa Diario pa no publica cosnan insultativo of cu no ta berdad contra su persona a wordo nenga. Hues a haya e demanda aki no suficientemente cla.
Autor: Ariën Rasmijn