E ruina di Bushiri Hotel cu Southwest Horeca Development NV kier tumba y pone un Hard Rock Hotel na su luga. Foto: Ariën Rasmijn
ORANJESTAD — Minister di Turismo Otmar Oduber a perde e caso sumario cu ela entama contra e columnista Jan de Ruyter y e matutino Solo di Pueblo. Hues no a haya e demanda suficientemente urgente pa wordo honra. E mandatario ta considerando pa lanta un bodemprocedure.
Minister Oduber kier a forsa cu e caso sumario aki pa Solo di Pueblo rectifica articulonan skirbi dor di De Ruyter den cual el a acusa e mandatario repitidamente di a ‘comete corupcion y facilita fraude’ pa cu e destaho di e proyecto di Bushiri Hotel cu a bay na Southwest Horeca Development NV cu e intencion pa construi un Hardrock Hotel.
Abogado di De Ruyter y minister Oduber na palabra
Segun De Ruyter e minister lo a manipula e procedura di destaho y otorgacion di e proyecto pa asina beneficia famia di su amigo ex-minister di finanzas Tico Croes, cu ta propietario di Southwest. Segun Oduber ambos Solo di Pueblo y De Ruyter lo a pasa e limitenan di libertad di expresion, manera ta ancra den tratado di Roma y articulo 1.2 di Staatsregeling di Aruba.
Acusacionnan publico di tal indole ademas ta causa cu e demanda di e mandatario tin urgencia. Solo y De Ruyter, cu a wordo representa pa abogado Anthony Ruiz, no ta haya cu e caso ta urgente anto riba dje Oduber, cu ta dispone di un aparato mediatico basta amplio por a contra-aresta tur e acusacionnan aki pero no a haci esaki.
Hues den esaki a duna e matutino y e columnista razon, bisando cu asunto di Hardrock Hotel ta andando pa dos aña caba y cu minister Oduber tabatin amplio oportunidad pa reacciona riba contenido di acusacionnan di De Ruyter. Minister Oduber varios biaha tambe a haci esaki. Riba dje hues ta bisa cu sin prueba di lo contrario no por conclui di antemano cu De Ruyter ta gaña. Es mas, e columnista tin documentacion cu ta rekeri splicacion segun hues. Minister Oduber por si e e kier duna splicacion riba esaki.
‘No ta di acuerdo pero ta respeta veredicto’
Den un reaccion telefonico, minister Oduber ta bisa cu e ta respeta veredicto di Hues aunke cu e no ta di acuerdo cune. E mandatario no ta haya cu ela perde e caso si no cu no tin ganador ni perdedor. E ta evaluando si lo bay entama un bodemprocedure, tumando den consideracion si e mester sigui duna atencion na De Ruyter of djis sigui cu su trabou.
Pa loke ta ponencia di Hues cu De Ruyter tin documentacion cu ta pidi splicacion di Oduber, e mandatario ta bisa cu berdad De Ruyter tin documentonan cu e mes a dune a base di ley di ‘openbaarheid van bestuur’, pero cu e no kier perde tempo na esaki.
Autor: Ariën Rasmijn