Èks minister di Finansa Roland Tuitt – Potrèt: Today/Milton Pieters
PHILIPSBURG – Den un halá di pèn èks minister di Finansa Roland Tuitt riba 14 di mei 2013 a amortisá no ménos ku 4.47 bion florin ($2.5 bion) di belasten i prima di e fondo di gastu di enfermedat spesial atrasá. E suma enorme aki ta dies be mas grandi ku e presupuesto aktual di Sint Maarten.
Konseho Sosial Ekonómiko (SER) a investigá e desishon i a konkluí ku e tabata ilegal. E Konseho ta rekomendá gobièrnu pa retirá e areglo i na lugá di esaki tuma medida pa mehorá kumplimentu ku e deber di paga belasten.
A taha
Tuitt na 2013 a firma un nota di maneho ku ta establesé reglanan di kobramentu di belasten. Tabata impliká ku a taha Ontvanger di kobra belasten di 2006 òf e añanan promé ku esaki. Tuitt ker a limpia e atministrashon di belasten i traha lugá pa por kobra e debenan di for di 2007. E minister a introdusí e medida ku forsa retroaktivo for di febrüari 2013.
Muchu lat
SER den su konseho na gobièrnu ta bisa ku nada no a logra di e ganashi mas haltu di belasten. “Na yanüari 2014 e College financieel toezicht a bisa ku e ganashi di belasten ainda ta muchu abou kompará ku Sint Maarten su kresementu ekonómiko.”
Ademas Ontvanger a bisa SER ku e ta kapas bon bon di kobra belasten di 2006, i asta di 2005. “Ta esaki Ontvanger tabata hasi ora e instrukshon di e minister a bini ku no por a kobra e debenan di belasten di e añanan 2006 i anterior mas.”
Pone un banda
Awor SER ta konsehá gobièrnu di pone e dokumento di maneho un banda i pa no hasi nada tampoko ku e landsverordening ku Tuitt a laga skibi pa e meta aki.
Outor Hilbert Haar