Chiro Emerenciana i partisipantenan na komienso di marcha foto: Extra Boneiru
KRALENDIJK – E marcha pasivo a kuminsá djadumingu mainta tempran na e kasnan di katibu na Salinja na Boneiru. Diessinku hende ta kana henter dia i marduga bou di guia di James Finies dor di diferente bario. E marcha tin dos meta: pone atenshon na e lucha pa ‘haña Boneiru bèk’ i eksihí un referèndem estatal.
E marcha lo terminá djaluna 10 di novèmber na Rincon na kas di dos desendiente di e katibu Martis di Katalina Janga. E marcha ta pa konmemorá e katibu aki. Riba e dia aki ta kumpli nèt 180 aña ku un grupo di katibu di rei bou di guia di Martis di Katalina Janga a lanta kontra di bombanan na e kunuku Fontein. E katibunan a keda mas o ménos un siman den wèlga.
Lucha
Bistí den flanèlnan ku diferente teksto i ku borchi i pamfletanan e partisipantenan a skucha un orashon i himno di Boneiru promé e marcha kuminsá. Chiro Emerenciana di 91 aña a hiba algun palabra i duna e partisipantenan sosten. “No ta un lucha fásil sin sakrifisio. No spanta pa esaki. Sigui boso lucha i sigui boso lider James Finies. ta un lucha hustu ku niun hende no por kibra.”
James Finies di e fundashon Nos Ke Boneiru Bèk i e partisipantenan ta eksihí pa e pueblo boneriano haña un referèndem. Komienso di òktober Konseho Insular a rechasá un moshon pa un referèndem promé ku elekshon lokal dia 18 di mart. Gobièrnu di Boneiru ta haña djaluna un petishon nobo pa bin ku un referèndem.
Outor Belkis Osepa