Sambil Kòrsou den pleno preparashon pa habri otro aña – pòtrèt: José Manuel Dias
WILLEMSTAD – Gerente general di Sambil Kòrsou, Jonathan Cohen, ta sorpendé pa e tiki interés di parti di komersiantenan lokal pa establesé den e sentro komersial gigante aki, ku lo habri su portanan dia 28 di mart di otro aña. Di tur e negoshinan ku ta bai habri den Sambil Kòrsou ta apenas 10% ta den man di komersiantenan lokal.
Un reportahe di José Manuel Dias
Grupo Sambil ta un negoshi di famia Cohen ku a kuminsá 55 aña pasá komo un empresa di konstrukshon. Constructora Sambil a konstruí mas di shen edifisio den Caracas i vários otro parti di Venezuela. Mas despues e grupo a kuminsá konstruí hotèlnan ku nan mes ta operá. Tabata 15 aña pasá ku e grupo a disidí di kuminsá konstruí sentronan komersial pa maneho propio.
Duda
Pa esnan ku tin duda den Sambil Kòrsou, Cohen a bisa ku Sambil ta karekterkisá ku su mes pa ehekushon di proyektonan realisabel. “Te ku aworaki no ta eksistí ningun proyekto ku Sambil a kuminsá i ku no a terminá esaki. E 150 mil habitantenan kombiná ku e mas o ménos un mion di turista ku Kòrsou ta risibí anualmente, ta proporshoná sufisiente merkado pa Sambil ”. Segun kalkulo ku lo tin un promedio di kuater mil persona pa dia ta sirkulá den Sambil Kòrsou.
Outor José Manuel Dias