Kontrol di seguridat Foto: Belkis Osepa
KRALENDIJK – E tratamentu di kontenido di e kaso di dòbel asesinato ta kuminsá dia 3 di febrüari otro aña. Total shete sospechoso ta será den e kaso aki.
Durante e kontinuashon di e tratamentu organisatorio a bin dilanti ku entre tantu lo hasi dos investigashon importante. Polis nashonal hulandes lo studia e datonan di telekomunikashon di nobo. Tambe kuerpo polisial di Hulanda Karibense lo investigá di nobo e imáhennan di vidio. si ta nesesario lo laga spesialistanan na Hulanda hasi e investigashon aki. Segun fiskal mayó Henry Hambeukers lo pone resultado di e dos investigashonnan banda di deklarashonnan di e sospechoso arestá resientemente Lisandro Martijn.
Deklarashonnan
Hambeukers ta satisfecho ku e tin espasio èkstra pa investigá speshalmente e deklarashonnan di Martijn. A interogá Martijn un total di diesdos bia. I kada bes e tabatin diferente deklarashon di loke a sosodé den anochi di 23 pa 24 yanüari ora a asesiná e dos víktimanan Francis Lourens i Thursten Scholts. Anteriormente a skucha Martijn komo testigu. Awor el a deklará ku e mes ta embolbí den e akto kriminal. Tambe el a duna di konosé ku e otro sinku sospechosonan tambe ta embolbí.
Hambeukers: “Nos mester haña sá kiko nos por k ere di su deklarashonnan. E pregunta ta: kiko e sa, kon e sa esei i kiko esaki ta nifiká pa nos investigashon. Nos ta kere ku e investigashonnan profundo lo por duna un bista di loke no ta klòp den e deklarashonnan duná.”
Distansha
Sospechoso Rayan Frans ta sera na Almere Hulanda. Durante e seshon organisatorio el a duna di konosé ku e no ke keda Hulanda. E no ke protekshon i ta sinti su mes netamente na Hulanda insegur. Frans ta lamentá ku dor di e distansha e no tin bon kontakto ku su abogado Roy Gonet. Gonet ta duda ku lo e keda kla na tempu pa febrüari. Resientemente el a biaha bai Hulanda pa papia ku Frans i promé ku febrüari e mester bolbe bai pa prepará p’é kaso.
Outor Belkis Osepa