Foto Extra Boneiru
KRALENDIJK – Un grupo di Boneriano determiná ta bivaker for di djaluna dilanti bestürkolezje di Boneiru. Nan ke un kontesta positivo riba nan petishon pa un referèndem estatal.
E grupo di e fundashon Nos Ke Boneiru Bèk a tende un nò riba e petishon ku nan a hasi na gezaghèber Edison Rijna pa organisá un referèndem. Rijna a presentá e petishon djamars anochi na Konseho Insular. E partidonan di kolaishon (UPB i Frakshon Santana) a bolbe duna di konosé kun an no ta partidario pa un referèndem promé ku elekshonnan lokal. Pero tòg no a pone plaka disponibel riba presupuesto pa un referèndem despues di elekshon. Partido di oposishon PDB si ta ketu bai na fabor di un referèndem.
Karta
E akshon di protesta di Nos Ke Boneiru Bèk a sigui depues di un marcha di protesta pasivo djadumingu último. Un nukleo fiho di e fundashon a kana un dia i anochi for di e kasnan di katibu na Salinja i pasa den diferente bario na Kòrsou. Djaluna mainta nan a entregá un karta na Rijna. For di e ora ei e grupo ku ta kambia di konstelashon a keda dilanti edifisio di bestürkolezje.
Rijna a informá despues ku un mayoria den konseho insular ta kontra di nan petishon. “Konseho insular tin e outoridat pa aprobá un proposishon di lei pa un referèndem. Si no tin un mayoria den konseho insular pa aprobá un lei pa organisá un referèndem nos sistema demokrátiko ta duna pueblo e oportunidat pa konvensé konseho insular. Pero si despues di varios intento no tin konsenso, mester respetá desishon di mayoria.”
Desobediensia
Rijna ta atvertí Nos Ke Boneiru Bèk pa desobediensia sivil ku pa definishon ta ílegal, asina el a bisa. “Si boso hasi uso di e instrumentu menshoná pa hasi eskai sin violensha i transparente. I boso mester karga e konsekuensha hurídiko.”
Presidente James Finies di Nos Ke Boneiru Bèk no ta eskluí mas akshon di protesta. E fundashon ta haña ku no ta tuma nan na serio i ku Rijna no a hasi su esfuerso pa intermediá. “Por lo pronto nos ta keda dilanti bestürkolezje, pasobra nos no a haña un kontesta satisfaktorio. Pueblo tin derecho pa ekspresa su mes tokante su futuro.”
Outor Belkis Osepa