André Bosman, Ronald van Raak, Roelof van Laar – potrèt: Suzanne Koelega
DEN HAAG – Sint Maarten mester bini ku un plan konkreto lihé pa garantisá integridat di su mandatarionan, sino tin chèns ku e pais lo bolbe haña un instrukshon.
Minister Ronald Plasterk di Relashonnan den Reino awe den un debate den Tweede Kamer atrobe a bisa ku mehorashon visibel ‘ta masha nesesario’. Mesora e ta ekspresa e speransa pa huntu ku Sint Maarten e por ehekutá medidanan ku ta na benefisio di integridat pa asina un instrukshon nobo lo no ta nesesario.
Na Den Haag ta traha na e medidanan ku a anunsiá promé di òktober pa entre otro reforsá Ministerio Publiko i Recherche Samenwerkingstean (RST) i pa ekipá un unit ku mester manehá kriminalidat di personanan di státùs sosial haltu den e pais. “E unit mester por chèck nv di gobiernu i komersio tambe”, segun Plasterk.
E minister ta bisa ku ‘pronto’ e ke papia den Rijksministerraad (RMR) tokante e medidanan ku ta pensa na Hulanda aktualmente i despues ehekutá nan den koperashon ku e pais Sint Maarten. E no ta duna un término eksakto.
Den Haag
Ta klaro ku ta solamente Den Haag lo elaborá e plan di akshon aki, i ku den e stadio aki no tin masha kontakto ku Sint Maarten tokante esaki. Plasterk: “Na final ta huntu nos mester hasié, ounke aktualmente esaki ainda no ta sosodé. Pero mi ta konvensí ku huntu nos lo logra. E programa di akshon ta importante pa asina hende por ta sigur ku gobièrnu i mandatarionan di nan pais ta sali na defensa di e interes komun i ku no tin niun sorto di abusu di poder i konflikto di interes.”
Speransa versus resultado
Tweede Kamer no ta kompartí Plasterk su speransa ku Sint Maarten i Hulanda lo yega un akuerdo pronto tokante e medidanan ku mester tuma. E parlamentarionan ta kontentu ku Plasterk a intervení via RMR, ma nan no ta mira e resultado ainda. Roelof van Laar (PvdA) ta pertinente: “Si gobièrnu di Sint Maarten no duna un plan di enfoke i un skema di tempu pero ta laga parse manera ta nos na Hulanda ta responsabel pa nan problemanan, mi ta tuma parti pa pueblo i mi ta sostené e di dos instrukshon tur ku tin ora e bini.”
Pa Ronald van Raak (SP) awor e momentu a yega di ‘gana òf pèrdè’ pa loke ta e trato di korupshon i nepotismo. “Algu ta bai kambia òf nos ta regalá mafia i plaka kriminal e pais.
Andre Bosman (VVD) no por komprondé ku Sint Maarten ta bisa ku e lo no koperá ku e screening ekstra pisá di e ministernan nobo ku Hulanda a imponé: “Si no duna kontenido na e instrukshonnan sin problema nos por konstatá ku por tira Statüt den bari di sushi, den kliko kuné!”
Outor: Jamila Baaziz