Komishon di evaluashon ta papia ku bonerianonan – potrèt: Extra Bonaire

Komishon di evaluashon ta papia ku bonerianonan – potrèt: Extra Bonaire

KRALENDIJK – E ‘Meet & Greet’ ku komishon di evaluashon tokante e státùs estatal di e kuerponan públiko Boneiru, Sint Eustatius i Saba a disparsé den un manifestashon di e simpatisadónan boneriano di un referèndem. Durante di e promé parada di e komishon bonerianonan a warda wak un poko.

E komishon di evaluashon bou di maneho di Liesbeth Spies, èks minister di Asuntunan Interior i Relashonnan den Reino for di djabièrnè ta bishitá e tres islanan. Pa mas lat 10 di òktober 2015 e komishon mester publiká un rapòrt tokante e efekto di e struktura estatal nobo.

Bonerianonan djabièrnè último por a duna nan opinion durante un Meet & Greet ku e komishon na Wilhelminaplein. Solamente algun desena di siudadano a akudí pa interkambiá di pensamentu ku e komishon saboriando un snèk i un drenks.

Diskushon
E Meet & Greet a haña un impulso berdadero ku presensia di presidente James Finies di e grupo di protesta Nos Ke Boneiru Bèk i otro partisipante di e manifestashon. Nan tin kasi un siman kaba ta bivaker dilanti bestürkolezje i ta eksihí un referèndem. Klamorosamente ku bòrchi i spanduk e grupo a hala atenshon pa nan derechi di outodeterminashon. Nan a drenta den un diskushon skèrpi ku e komishon. “E komishon ta un trampa pa nos kai aden. Ta solamente pa duna bonerianonan speransa falsu. E státùs ku nos a haña riba 10 di òktober 2010 ta ilegal. E ora ei e komishon di evaluashon tambe ta ilegal.”

Finies den kombersashon ku Thodé i Soons – potrèt: Extra Bonaire

Finies den kombersashon ku Thodé i Soons – potrèt: Extra Bonaire

Spies i sobra miembronan di e komishon esta Glenn Thodé ku ta rèktòr di Universidat di Aruba i èks gezaghebber di Boneiru, Fred Sons ku ta katedrátiko emérito di Universidat di Utrecht, Luc Verhey ku ta katedrátiko di Universidat di Leiden i staatsraad di Raad van State i Frans Weekers ku ta èks sekretario di estado i di Finansa a tene kombersashonnan eksitá den e plenchi ku e manifestantenan. Nan a splika ku aktualmente ta trata solamente di kompilashon di informashon pa duna forma na e investigashon. Tabatin pregunta tokante entre otro penshun, siguridat sosial i belasten. Spies: “Hopi hende tin prekupashon grandi i nan ta rabiá tambe. Esei nan a ekspresá bon kla.”

Soons ta pro referèndem
Finies a drenta un diskushon ku katedrátiko emérito Soons tambe. E katedrátiko anteriormente a indiká ku mester tene referèndem riba e islanan atrobe despues di e evaluashon, prome ku e struktura estatal bira permanente. “Hulanda pa loke ta e proseso di dekolonisashon di Antia nunka no a terminá e prosedura formalmente ku referèndemnan”, Soons a bisa den un entrevista na 2010 na Wereldomroep.

Finies a splika Soons ku e referèndem mester keda lòs di e evaluashon. “Polítika ta usa e evaluashon pa no tene referèndem i esei ta malu.”Segun Spies e komishon ta traha independientemente. “Esei tambe ta prekupá hende. Nan ta kere ku ku ta polítika ta manda nos pero esei no ta e kaso niun ora so. E deber ta na nos pa den e konklushonnan di e investigashon prueba ku nos a traha ophetivamente i independientemente.”

Outor: Belkis Osepa